ىشكى ىستەر مينيسترلىگى جاڭا كونستيتۋتسياسىنىڭ قابىلدانۋىنا بايلانىستى راقىمشىلىق جاساۋ تۋرالى زاڭنىڭ ىسكە اسىرىلۋى تۇراقتى باقىلاۋدا ەكەنىن مالىمدەدى، دەپ حابارلايدى «ادىرنا» ءتىلشىسى polisia.kz-كە سىلتەمە جاساپ.
«زاڭ كۇشىنە ەنگەن العاشقى كۇننەن باستاپ بارلىق اۋماقتىق بولىمشەلەردە جۇيەلى جۇمىس ۇيىمداستىرىلدى. ءبىز كۇن سايىن ماتەريالداردىڭ ۋاقىتىلى دايىندالۋىن، ولاردىڭ سوتتارعا جولدانۋىن جانە قابىلدانعان سوت شەشىمدەرىنىڭ ورىندالۋىن باقىلاۋدا ۇستايمىز. بۇگىنگى تاڭدا سوتتارعا 10 مىڭنان استام ۇسىنىس جولداندى. ونىڭ ىشىندە 4400-گە جۋىعى قىلمىستىق-اتقارۋ جۇيەسى مەكەمەلەرىمەن، ال 6900-دەن استامى پروباتسيا قىزمەتتەرىمەن دايىندالعان»،- دەدى ءىىم قىلمىستىق-اتقارۋ جۇيەسى كوميتەتى توراعاسىنىڭ ءبىرىنشى ورىنباسارى نياز رىسپاەۆ.
قازىرگى تاڭدا سوتتار مىڭنان استام ماتەريالدى قاراپ شىققان. ناتيجەسىندە قىلمىستىق-اتقارۋ جۇيەسى مەكەمەلەرىنەن 620 ادام بوساتىلعان. ولار ەندى اكىمشىلىك قاداعالاۋدا بولادى.
پروباتسيا قىزمەتىنىڭ ەسەبىندە تۇرعان 724 ازامات تا جازاسىن وتەۋدەن بوساتىلعان. سونىمەن قاتار 730-دان استام سوتتالعاننىڭ جازا مەرزىمى قىسقارتىلعان.
«ايتا كەتۋ كەرەك، قىلمىستىق راقىمشىلىق اۆتوماتتى تۇردە قولدانىلمايدى. ءاربىر سوتتالعان بويىنشا ماتەريالدار جەكە قارالىپ، تۇپكىلىكتى شەشىمدى تەك سوت قابىلدايدى»،– دەدى سپيكەر.
