زەينەت جاسىنا جاقىنداعاندارعا جۇمىس تاۋىپ بەرۋ جوباسى ىسكە قوسىلماق

2599
Adyrna.kz Telegram

ەڭبەك جانە حالىقتى الەۋمەتتىك قورعاۋ مينيسترلىگى زەينەت جاسىنا جاقىنداعان قىزمەتكەرلەردى قولداۋ بويىنشا جاڭا جوبانى قولعا الىپ جاتىر. ول بويىنشا مەملەكەت ەگدە جاستاعى جۇمىسشىلاردىڭ ەڭبەكاقىسىن سۋبسيديالايدى. بۇل تۋرالى بريفينگتە ۆيتسە-مينيستر ەرجان ءبىرجانوۆ مالىمدەدى، دەپ حابارلايدى “ادىرنا” ۇلتتىق پورتالى Sputnik قازاقستانعا سىلتەمە جاساپ. 

ول زەينەتكە ءالى شىقپاعان ەگدە جاستاعى ادامداردىڭ جۇمىس تابۋى قيىن ەكەنىن اتاپ ءوتتى. وسىعان بايلانىستى ۆەدومستۆو "كۇمىس جاس" اتتى جاڭا جوبانى ىسكە اسىرۋدى جوسپارلاپ وتىر.

"ول بويىنشا ءبىز ەكى جىل بويى، زەينەتكە دەيىن جۇمىس بەرۋشىگە ەڭبەكاقىنىڭ بەلگىلى ءبىر كولەمىن وتەيمىز. قازىر بۇل ماسەلە پىسىقتالىپ جاتىر، ۇسىنىس قولداۋ تاپتى. بىزدە ناقتى تسيفرلار، بولجام بار. ەندى وسى ماسەلەلەردى شەشۋ كەرەك", – دەدى ءبىرجانوۆ.

ايتۋىنشا، 40-45 جاستاعى ادامداردى جۇمىسقا ورنالاستىرۋ بويىنشا ەشقانداي پروبلەما جوق. بۇل سانات ەڭبەك نارىعىندا وتە بەلسەندى سانالادى.

ۆيتسە-مينيستر وقۋدى ەندى بىتىرگەن جاستار دا كوپكە دەيىن جۇمىس تابا الماي قينالاتىنىن ايتتى.

مينيسترلىك جاستار ءۇشىن "جاستار پراكتيكاسى" جانە "العاشقى جۇمىس ورنى" اتتى جوبالاردى ازىرلەدى.

ەڭبەك مينيسترلىگىنىڭ مالىمەتىنشە، قازىر ەلىمىزدە جۇمىسسىزدىق دەڭگەيى 4,9 پروتسەنتتى قۇرايدى. ياعني، 449 مىڭ ادام جۇمىسسىز رەتىندە تىركەۋدە تۇر.

پىكىرلەر