شىعىس قازاقستان وبلىسىنداعى بالالار ءۇيىنىڭ ديرەكتورلارى مەن ەسەپشىلەرى 63 ميلليون تەڭگەنى جىمقىردى دەپ كۇدىكتەلۋدە، دەپ حابارلايدى «ادىرنا» ۇلتتىق پورتالى.
العاش رەت بۇل جانجال 2019 جىلدىڭ قاڭتارىندا، مامانداندىرىلعان بالالار ءۇيىنىڭ 160 قىزمەتكەرى جاڭا جىل قارساڭىندا جالاقىسىز قالعان كەزدە باستالعان ەدى. سودان كەيىن جەلىدە باس ەسەپشى مەن بالالار ءۇيىنىڭ ديرەكتورى 15 ميلليون تەڭگەنى يەمدەنگەنىن كوپشىلىك الدىندا مويىنداعان ۆيدەوسى جاريالانعان بولاتىن. بۇل اقشا جەتىم بالالاردى اسىراۋعا ارنالعان قاراجات ەدى.
اقشاسىز قالعان قىزمەتكەرلەر ءىس قوزعالمايدى دەپ قورقىپ، پروكۋراتۋرا مەن باق-تان كومەك سۇرادى. قىلمىستىق ءىس قوزعالدى.
«وسكەمەن قالاسىنىڭ N2 سوتىندا قىلمىستىق ءىس قوزعالدى. مامانداندىرىلعان بالالار ءۇيىنىڭ بۇرىنعى قىزمەتكەرلەرى - ەكس-ديرەكتور، باس ەسەپشى جانە كادرلار ءبولىمىنىڭ مامانى بيۋدجەت قاراجاتىن جىمقىردى دەگەن ايىپتار تاعىلدى. . ولار 2015 جىلدىڭ ناۋرىزىنان 2018 جىلدىڭ جەلتوقسانىنا دەيىن 63 ميلليون تەڭگەنى ۇرلاعان»، دەدى شىعىس قازاقستان وبلىستىق سوتى توراعاسىنىڭ مىندەتىن اتقارۋشى قايرات چاكپانتاەۆ.
«ادىرنا» ۇلتتىق پورتالى
