«تىيىم سالۋ كەرەك»: بەكبولات تىلەۋحان ۇرىعىن ساتاتىندار تۋرالى ايتتى

3602
Adyrna.kz Telegram

ءماجىلىس دەپۋتاتى بەكبولات تىلەۋحان ەلىمىزدە اتالىق جانە انالىق ۇرىقتىڭ بىرىڭعاي بازاسىن قۇرۋ مەن ءبىر رەتتەن ارتىق دونور بولۋعا تىيىم سالۋ تۋرالى ايتتى، دەپ حابارلايدى «ادىرنا» ۇلتتىق پورتالى.

ول پرەمەر-ءمينيستردىڭ ورىنباسارى ەرالى توعجانوۆقا ۇرىق دونورى پروبلەماسىن كوتەرە وتىرىپ، سۇراق قويدى.

«زاڭ بويىنشا 35 جاسقا دەيىنگى ەر ادام ءانونيمدى تۇردە دونور بولا الادى. دەنى ساۋ، دەنە ءبىتىمى قالىپتى دامىعان، گەنەتيكالىق ساراپتاماسى جاقسى بولسا، اتالىق ۇرىعىن تاپسىرا الادى. قانشا رەت تاپسىراسىز ءوز ەركىڭىز. شەكتەۋ جوق. انكەتادا ءجۇزى، رۋى، بويى، سالماعى، ماماندىعى كورسەتىلەدى، بولدى. كاتالوگتان كوڭىلىڭىزگە قونعانىن تاڭداپ الاسىز، ءبىتتى»، – دەيدى دەپۋتات.

بەكبولات تىلەۋحاننىڭ سوزىنشە، ستاتيستيكا بويىنشا جىل سايىن تەك ءبىر عانا كلينيكانىڭ وزىندە وسى جولمەن 70 بالا ومىرگە كەلەدى ەكەن.

«بۇل – ەرتەڭ ەلىمىزدىڭ تۇكپىر-تۇكپىرىندەگى 20 وتباسىدا ءبىر اكەدەن تارايتىن 20 ۇل-قىز بويجەتىپ، ەرجەتىپ شىعادى دەگەن ءسوز. ودان كوپ بولۋى دا مۇمكىن. ءبىر اكەدەن تاراعان جانداردىڭ ءبىر-بىرىنە ۇيلەنۋىنىڭ الدىن الۋ ءۇشىن، اۋرۋ بالالاردىڭ سانىن ازايتۋ ءۇشىن بۇل ماسەلە وتە ماڭىزدى دەپ ويلايمىن»، – دەدى ول.

دەپۋتات ءبىر رەتتەن ارتىق دونور بولۋعا رۇقسات ەتپەۋ كەرەك دەگەن پىكىردە. سونداي-اق ول ءبىر دونوردىڭ ۇرىعىن ەكى ادامنان ارتىققا قولدانباۋدى ۇسىندى.

پىكىرلەر