Májilis depýtaty Bekbolat Tileýhan elimizde atalyq jáne analyq uryqtyń biryńǵaı bazasyn qurý men bir retten artyq donor bolýǵa tyıym salý týraly aıtty, dep habarlaıdy «Adyrna» ulttyq portaly.
Ol premer-mınıstrdiń orynbasary Eraly Toǵjanovqa uryq donory problemasyn kótere otyryp, suraq qoıdy.
«Zań boıynsha 35 jasqa deıingi er adam anonımdi túrde donor bola alady. Deni saý, dene bitimi qalypty damyǵan, genetıkalyq saraptamasy jaqsy bolsa, atalyq uryǵyn tapsyra alady. Qansha ret tapsyrasyz óz erkińiz. Shekteý joq. Anketada júzi, rýy, boıy, salmaǵy, mamandyǵy kórsetiledi, boldy. Katalogtan kóńilińizge qonǵanyn tańdap alasyz, bitti», – deıdi depýtat.
Bekbolat Tileýhannyń sózinshe, statıstıka boıynsha jyl saıyn tek bir ǵana klınıkanyń ózinde osy jolmen 70 bala ómirge keledi eken.
«Bul – erteń elimizdiń túkpir-túkpirindegi 20 otbasyda bir ákeden taraıtyn 20 ul-qyz boıjetip, erjetip shyǵady degen sóz. Odan kóp bolýy da múmkin. Bir ákeden taraǵan jandardyń bir-birine úılenýiniń aldyn alý úshin, aýrý balalardyń sanyn azaıtý úshin bul másele óte mańyzdy dep oılaımyn», – dedi ol.
Depýtat bir retten artyq donor bolýǵa ruqsat etpeý kerek degen pikirde. Sondaı-aq ol bir donordyń uryǵyn eki adamnan artyqqa qoldanbaýdy usyndy.
