قازاقستاندا 2021 جىلعى ورتاشا زەينەتاقى كولەمى بەلگىلى بولدى. بيىلعى 1 ساۋىرىندەگى جاعداي بويىنشا زەينەتكەرلەر سانى 2 ملن 247 مىڭ ادامدى قۇراعان جانە ورتاشا زەينەتاقى تولەمى 100 163 تەڭگە بولدى، دەپ جازدى Stan.kz.
قاڭتار-ناۋرىز ايلارىندا بازالىق زەينەتاقىنى تولەۋگە رەسپۋبليكالىق بيۋدجەتتەن 205,8 ملرد تەڭگە، ىنتىماقتى زەينەتاقىنى تولەۋگە – 465,4 ملرد تەڭگە باعىتتالدى.
اتاپ ايتقاندا، ناۋرىز ايىندا رەسپۋبليكالىق بيۋدجەتتەن زەينەتاقى تولەمدەرىنە 223,8 ملرد تەڭگە، ونىڭ ىشىندە بازالىق زەينەتاقىنى تولەۋگە – 68,6 ملرد تەڭگە، ىنتىماقتى زەينەتاقىنى تولەۋگە – 155,2 ملرد تەڭگە باعىتتالدى.
"2021 جىلعى 1 ساۋىردەگى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 100 163 تەڭگەنى قۇرادى", – دەدى قر ەڭبەك جانە حالىقتى الەۋمەتتىك قورعاۋ مينيسترلىگىندە.
قازاقستاندا 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءاربىر الۋشىعا ونىڭ زەينەتاقى جۇيەسىنە قاتىسۋ ءوتىلىن ەسكەرە وتىرىپ، جەكە تاعايىندالادى. زەينەتاقى جۇيەسىنە قاتىسۋ وتىلىنە 1998 جىلعى 1 قاڭتارعا دەيىن ىنتىماقتى جۇيەدە جيناقتالعان ەڭبەك ءوتىلى دە، سول كۇننەن كەيىن دە – مىندەتتى زەينەتاقى جارنالارى (مزج) تولەنگەن كەزەڭدەر نەگىزىندە دە ەنگىزىلەدى. بۇل رەتتە مزج تولەۋدىڭ ءبىر ايى جيناقتاۋشى زەينەتاقى جۇيەسىندەگى ءوتىلدىڭ ءبىر ايى رەتىندە ەسكەرىلەدى.
ەگەر زەينەتاقى جۇيەسىنە 10 جانە ودان از جىلدى قۇراسا نەمەسە مۇلدەم بولماسا، بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ 54% -نا تەڭ، ودان ءارى 10 جىلدان استام ءاربىر جىل ءۇشىن ونىڭ مولشەرى 2% -عا ۇلعايادى. مىسالى، 20 جىل قاتىسسا، بازالىق زەينەتاقى ەڭ تومەنگى كۇنكورىس دەڭگەيىنىڭ 74%-ىن، 30 جىل بولسا، ەڭ تومەنگى كۇنكورىس دەڭگەيىنىڭ 94% -ىن قۇرايدى. ەڭبەك ءوتىلى 33 جانە ودان كوپ جىل بولعان كەزدە ول ەڭ تومەنگى كۇنكورىس دەڭگەيىنىڭ 100%- ى مولشەرىندە بەلگىلەنەدى.
ايتا كەتەيىك، مىندەتتى زەينەتاقى جارنالارى قانشالىقتى تۇراقتى جانە تولىق كولەمدە تولەنسە، ازاماتقا زەينەتاقى جاسىنا جەتكەن كەزدە بازالىق زەينەتاقى تولەمىنىڭ مولشەرى سوعۇرلىم جوعارى بولادى.
جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جاعداي بويىنشا ەڭبەك وتىلىنە (كەمىندە 6 اي تالاپ ەتىلەدى) جانە زەينەتاقى الدىنداعى كەزەڭدە الىنعان ورتاشا ايلىق كىرىسكە بايلانىستى بولادى.
"ادىرنا" ۇلتتىق پورتالى
