ۇلتتىق بىرىڭعاي تەستىلەۋ ۋاقىتى مەن بيىلعى وقۋ جىلىنا بولىنگەن گرانت سانى بەلگىلى بولدى. بۇل تۋرالى قر عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ ءمالىم ەتتى، دەپ حابارلايدى "ادىرنا" ۇلتتىق پورتالى.
بيىل 18 مامىردان باستاپ نەگىزگى ۇبت باستالدى. ناقتىراق ايتساق، وقۋشىلاردىڭ ءبىلىمىن ايتقىندايتىن تەستىلەۋ 5 شىلدەگە دەيىن جالعاسادى. تالاپكەرلەر ءۇشىن 88 مىڭ گرانت بولىنگەنى بەلگىلى بولدى.
«جالپى، ۇبت-عا 166 مىڭ تالاپكەر ءوتىنىش تاپسىردى. بيىل مەملەكەت باسشىسى قاسىم-جومارت كەمەلۇلى توقاەۆتىڭ بەرگەن تاپسىرماسىن ورىنداۋدى جالعاستىرامىز. بۇل رەتتە گرانتتىڭ 60 پايىزى ينجەنەرلىك-تەحنيكالىق ماماندىقتاردى قامتيدى. سونداي-اق، تىعىز ورنالاسقان، جاڭا قۇرىلعان جانە باتىس ايماقتارىنداعى جاستار ءۇشىن دە ارنايى گرانت بولىنگەن. 2023 جىلى وڭىرلىك جوو-لارعا بولىنەتىن پەداگوگيكالىق كۆوتا سانى ارتىپ، 6280 گرانت ءبولىندى. ال «سەرپىن» باعدارلاماسى بويىنشا 3653 گرانت ءبولىندى»، - دەدى ق. ەرعاليەۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
جوعارعى ءبىلىم ءمينيسترى ورىنباسارىنىڭ ايتۋىنشا، «سەرپىن» باعدارلاماسىنىڭ يىگىلىگىن كورگەندەر بيىل ءۇش جىل ەمەس، ەكى جىل كولەمىندە ءوز مىندەتىن وتەيدى. سونداي-اق، گرانتتى جۇمىس ارقىلى وتەۋ وقىعان ايماقتا عانا ەمەس، باعدارلاما اياسىندا قامتىلعان باسقا ايماقتارعا دا بارۋعا بولادى.
«ءبىلىم بەرۋ گرانتتارىنىڭ جالپى سانى 88 مىڭدى قۇرادى. ونىڭ ىشىندە باكالاۆرياتتا وقۋ ءۇشىن 73 مىڭ گرانت، ماگيستراتۋراعا – 13 مىڭ، دوكتورانتۋراعا 1890 گرانت ءبولىنىپ وتىر. بيىل گرانتقا قۇجاتتاردى قابىلداۋ جانە ونىڭ يەگەرلەرىنىڭ ءتىزىمىن جاريالاۋ كۇندەرىنە قاتىستى وزگەرىس بولمايدى. ياعني، 13-20 شىلدە ارالىعىندا گرانتقا قۇجاتتاردى قابىلداۋدى، ال گرانت يەگەرلەرىنىڭ ءتىزىمىن 10 تامىزعا دەيىن جاريالاۋدى جوسپارلاپ وتىرمىز. جوعارى ورىندارىنا قابىلداۋ 25 تامىزعا دەيىن جۇزەگە اسىرىلادى»، - دەدى ۆيتسە-مينيستر.
"ادىرنا" ۇلتتىق پورتالى
