سولتۇستىك قازاقستان وبلىسىندا تيميريازەۆ اۋدانى دوكۋچاەۆ ەلدى مەكەنىنىڭ 20 شاقتى تۇرعىنى قۇتىرما اۋرۋىنا قارسى ەگىلىپ جاتىر. بۇل تۋرالى “ادىرنا” ۇلتتىق پورتالى Nege.kz سايتىنا سىلتەمە جاساپ حابارلايدى.
سقو سانيتاريالىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، تيميريازەۆ اۋدانى دوكۋچاەۆ ەلدى مەكەنىندەگى شارۋاشىلىقتاردىڭ بىرىندە قۇتىرما اۋرۋىنىڭ تابىلۋىنا بايلانىستى ءتيىستى سانيتاريالىق ءىس-شارالار قولعا الىندى.
ياعني اۋرۋ مالدى ساۋىپ، باققان جۇمىسشىلاردىڭ سانى انىقتالدى. قازىر 19 ادام مەديتسينالىق قىزمەتكەرلەردىڭ باقىلاۋىندا. ولارعا قۇتىرماعا قارسى ۆاكتسينا ەگىلىپ جاتىر.
«اۋرۋ مالمەن بايلانىستا بولعان جۇمىسشىلاردىڭ جاعدايلارى جاقسى. بۇل قاۋىپتى اۋرۋمەن كۇرەستىڭ ەڭ ءتيىمدى ءتاسىلى – ەكپە قويعىزۋ. نەگىزى ەمى جوق. اۋىرعانداردىڭ جۇيكە جۇيەسى زاقىمدانادى. تىنىس الۋى اۋىرلاپ، سوڭى ولىمگە اكەلەدى. ال ادامعا جانۋارلاردىڭ سىلەكەيى ارقىلى جۇعادى»، – دەيدى سقو سەبد ءبولىم باستىعى يۋليا گايسينا.
سقو-دا سوڭعى رەت قۇتىرما اۋرۋىمەن اۋىرعان ادام 1998 جىلى تىركەلگەن ەكەن.
«ەلدى مەكەندەردە جابايى اڭدار پايدا بولعان جاعدايدا ولاردى ءۇي جانۋارلارىنا جاقىنداتپاۋ قاجەت. ويتكەنى قۇتىرما اۋرۋىن نەگىزگى تاراتۋشىلار – جىرتقىش اڭدار. ولاردان يت-مىسىققا، ءتورت تۇلىككە جۇعادى. اسىرەسە كوكتەم ۋاقىتىندا يت-مىسىقتى قاماپ ۇستاعان ءجون. ال ءۇي جانۋارى نەمەسە جىرتقىش اڭ قاۋىپ نەمەسە تىرناعان جاعدايدا جاراقاتتى سابىنداپ جۋىپ، 70 % سپيرتپەن نەمەس يودپەن ءسۇرتۋ قاجەت. كەيىن مىندەتتى تۇردە ەمدەۋ مەكەمەسىنە كورىنۋ كەرەك»، – دەيدى يۋليا گايسينا.
جىل باسىنان سقو-دا جانۋارلار قاپقان 246 ادام مەديتسينالىق كومەككە جۇگىنگەن. ولاردىڭ بارلىعى قاجەتتى ۆاكتسينانى الدى. بۇعان دەيىن سقو-داعى شارۋاشىلىقتاردىڭ بىرىندە قۇتىرما اۋرۋىنىڭ انىقتالىپ، 60 كۇنگە شەكتەۋ شارالارىنىڭ ەنگىزىلگەنىن ايتقان ەدىك.
