«سپۋتنيك V» ۆاكتسيناسىن 24 مىڭنان استام ادام قابىلدادى

694

الماتى وبلىسىندا سوڭعى تاۋلىكتە 254 ادام كوروناۆيرۋس جۇقتىرعان. ناتيجەسىندە اۋرۋدىڭ ءوسۋ قارقىنى 1,6% قۇرادى. كەسەل تەكەلى، تالدىقورعان قالالارى مەن كوكسۋ، قاراتال، ەسكەلدى، ۇيعىر، پانفيلوۆ اۋداندارىندا كوپ تاراعان.  قازاقستان وڭىرلەرىندەگى ەپيدەميولوگيالىق جاعدايدى باعالاۋ ماتريتساسىنا سايكەس الماتى وبلىسى «قىزىل» ايماقتا ورنالاسقان.

ايماقتاعى ەپيدەميولوگيالىق احۋالدى جاقسارتۋ ماقساتىندا كارانتيندىك شارالار تاعى دا كۇشەيتىلمەك. وسىعان وراي الماتى وبلىسىنىڭ باس سانيتارلىق دارىگەرىنىڭ №8 قاۋلىسى شىقتى.

«جاڭا تالاپتارعا ساي، تويحانالار، تەاترلار مەن كينوتەاترلاردىڭ قىزمەتى توقتاتىلا تۇرادى.  سونداي-اق اۋدانى 2000 شارشى مەتردەن اساتىن ازىق-تۇلىك ەمەس دۇكەندەردىڭ جۇمىسىنا تىيىم سالىنادى. ءدىني نىسانداردىڭ جۇمىسىنا دا شەكتەۋ قويىلادى. ماسەلەن، ازاماتتارعا قۇدايعا قۇلشىلىق ەتۋ، اۋىزاشار تۇرىندە ۇجىمدىق ءىس-شارالار وتكىزۋگە بولمايدى. كەشكى ناماز (تاراۋيح) جانە جۇما نامازىن كەمىندە 2 مەتر الەۋمەتتىك قاشىقتىقتى ساقتاي وتىرىپ، اشىق اۋادا  وقۋعا بولادى»,- دەيدى الماتى وبلىسى بويىنشا سانيتاريالىق - ەپيدەميولوگيالىق باقىلاۋ باسشىسىنىڭ ورىنباسارى اسحات چاراپيەۆ.

سونىمەن قاتار جۇمىس كۇندەرى قوعامدىق تاماقتانۋ نىساندارى ساعات 09:00-دەن 20:00-گە دەيىن جۇمىس ىستەيدى، سەنبى جانە جەكسەنبى كۇندەرى ۋاقىت بويىنشا شەكتەۋسىز شىعارۋ جانە جەتكىزۋ جۇمىستارىن قوسپاعاندا قىزمەتكە تىيىم سالىنادى.

بارشاعا ءمالىم، جىل باسىنان وڭىردە حالىقتى COVID-19-عا قارسى ۆاكتسيناتسيالاۋ جۇمىستارى باستالعان بولاتىن.  قازىرگى تاڭدا وبلىستا 117 ەگۋ پۋنكتى جۇمىس ىستەيدى، ولاردىڭ 7-ءى وبلىس ورتالىعىندا ورنالاسقان.

سوڭعى مالىمەتتەرگە سايكەس، وڭىردە 24 803 ادام «سپۋتنيك V» ۆاكتسيناسىنىڭ ءبىرىنشى كومپونەنتىن قابىلداعان. ونىڭ ىشىندە 11887 مەديتسينا قىزمەتكەرى، 7809 پەداگوگ، 11 ستۋدەنت، 1966 اسكەريلەر، 563 مەملەكەتتىك قىزمەتكەر، 94 سوزىلمالى اۋرۋلارى بار ادامدار، 2388 باسقا تۇلعالار ەكپە العان.

ۆاكتسينانىڭ ەكىنشى بولىگى 21 كۇننەن كەيىن الىنادى. وبلىس بويىنشا، ەكىنشى كومپونەنتتى  8122 ازامات قابىلداعان.  ولاردىڭ قاتارىندا 6303 مەديتسينا قىزمەتكەرى، 1689 پەداگوگ، 52 قارۋلى كۇشتەر قىزمەتكەرلەرى، 74 مەملەكەتتىك قىزمەتشى، 4 باسقا تۇلعالار بار.

مامانداردىڭ ايتۋىنشا، ەگىلگەندەر اراسىندا ۆاكتسيناتسيادان كەيىنگى رەاكتسيالار مەن اسقىنۋلار تىركەلمەگەن.

پىكىرلەر
ۇقساس جاڭالىقتار