جەتىسۋ وڭىرىندە جەتەكشى كاسىپورىندار ۆاكتسيناتسيالاۋعا اتسالىسۋدا

1065

جەتىسۋ وڭىرىندە الماتى وبلىسىندا 62 اۋىل شارۋاشىلىعى جانە ونەركاسىپتىك كاسىپورىنى COVID-19 قارسى ەكپە ەگۋ جۇمىسىن باستادى. ناتيجەسىندە 2,5 مىڭنان استام جۇمىسشى ۆاكتسيناتسيا الدى.

جالپى وڭىردە حالىق اراسىندا ەكپە ەگۋ ناۋقانى جالعاسۋدا. 20 ساۋىردەگى جاعداي بويىنشا كوروناۆيرۋستىق ينفەكتسياعا قارسى ۆاكتسينانىڭ ءى كومپونەنتىمەن 101 477 ادام ەگىلدى، ءىى كومپونەنتىمەن تاعى 10 432 ۆاكتسيناتسيالاندى. كاسىپكەرلەردىڭ ايتۋىنشا، پاندەميا كەزىندە قىزمەتكەرلەر مەن شىعارىلاتىن ونىمدەردىڭ قاۋىپسىزدىگىن قامتاماسىز ەتۋ ءۇشىن سانيتارلىق باقىلاۋ شارالارىن ساقتاۋ جەتكىلىكسىز، ۆيرۋستى جۇقتىرىپ الماس ءۇشىن ۆاكتسينا الۋدى قامتاماسىز ەتۋ ماڭىزدى.

سوڭعى اپتادا الماتى وبلىسىندا ەكپە ەگۋ ناۋقانىنا 62 جەكە كاسىپكەر، اۋىل شارۋاشىلىعى كەشەندەرىنىڭ، ءسۇت زاۋىتتارىنىڭ جانە ونەركاسىپتىك كاسىپورىنداردىڭ ۇجىمدارى قوسىلدى. وسىلايشا، بيزنەس نىساندارى مەن ۆاكتسيناتسيا پۋنكتتەرىندە 2,5 مىڭنان استام قىزمەتكەر COVID-19 قارسى  ۆاكتسيناسىن الدى.

ەكپەدەن بۇرىن دارىگەرلەر قىزمەتكەرلەرگە ۆاكتسينا كومپونەنتىنىڭ ارتىقشىلىقتارى مەن قارسى كورسەتىلىمدەرى تۋرالى كەڭەس بەرەدى. ۆيرۋسقا قارسى يممۋنيتەتتى العىسى كەلەتىندەردىڭ ارقايسىسىمەن جەكە ساۋالناما جانە مەديتسينالىق تەكسەرۋ جۇرگىزىلەدى.
وبلىستىڭ ەڭبەك ۇجىمدارى اراسىندا العاشقىلاردىڭ ءبىرى بولىپ تالدىقورعان قالاسىنداعى «شىمىر» جشس قىزمەتكەرلەرى ەكپە سالدىردى. قۇرىلىس كومپانياسىندا 100-دەن استام مامان بار. وسى ايدا قىزمەتكەرلەردىڭ 15% ەكپە السا، شىلدە ايىنا دەيىن قىزمەتكەرلەردىڭ جارتىسىنان كوبى ۆاكتسيناتسيالاۋدى جوسپارلاپ وتىرعانىن جەتكىزدى كاسىپورىن ديرەكتورى رۋسلان ۆاليشانوۆ.

- سىنعا قاراماستان، ۆاكتسينا - پاندەميامەن كۇرەسۋدىڭ ەڭ ءتيىمدى ءادىسى. ويتكەنى ونىڭ كومەگىمەن كوپتەگەن ىندەتتەردىڭ ەمى تابىلدى. بۇل ۆيرۋستى دا وسىلاي جەڭۋگە بولادى. كومپانيانىڭ قىزمەتكەرلەرىمەن بىرگە دەنىمىز ساۋ جانە مىقتى بولۋىمىز ءۇشىن ەكپە جاساتتىم، - دەدى «شىمىر» جشس قىزمەتكەرى نادەجدا بازياك.

وسى كۇندەرى ەلىمىزدەگى بالمۇزداقتىڭ ءىرى ءوندىرۋشىسى «شين-لاين» كاسىپورنى ءوز قىزمەتكەرلەرىن ۆاكتسيناتسيالاۋ بويىنشا اۋقىمدى ناۋقان باستادى. كاسىپورىندا ەكپە سالدىرۋ 15 ساۋىردە باستالىپ، مامىر ايىنىڭ سوڭىندا اياقتالادى. وسى ۋاقىتقا قارسى كورسەتىلىمدەرى بار قىزمەتكەرلەردى قوسپاعاندا، جۇمىسشىلاردىڭ شامامەن 70% ۆاكتسيناتسيالاۋ جوسپارلانۋدا. ءوز كەزەگىندە كومپانيا باسشىلىعى دا ەكپە العان. "كاسىپورىن ۇجىمىن ۆاكتسيناتسيالاۋ تۋرالى شەشىم بۇگىنگى كۇنى ادامداردى COVID–19 جۇقتىرۋدان قورعاۋدىڭ جالعىز سەنىمدى ءادىسى بولىپ تابىلادى، ءارى كومپانيانىڭ ۇزدىكسىز جۇمىس ىستەۋىنە مۇمكىندىك بەرەدى", - دەيدى زاۋىت وكىلدەرى. بۇگىنگى تاڭدا 180-گە جۋىق قىزمەتكەر ەكپە الدى.

- قىزمەتكەرلەر ءۇشىن كوروناۆيرۋسقا قارسى يممۋنيتەتپەن قورعالعان ۇجىمداعى اۋىسىمدا بولۋ الدەقايدا ءتيىمدى. بۇل ادامداردىڭ جەكە قاۋىپسىزدىك ماسەلەسىنىڭ شەشىمى. كومپانيا ءوزىنىڭ ءاربىر قىزمەتكەرىن باعالايدى جانە ءونىمنىڭ قاۋىپسىزدىگىن قامتاماسىز ەتۋ ءۇشىن بارلىعىن جاساۋعا ءازىر. سونىمەن قاتار، ۇجىمداعى ۆاكتسيناتسيا كاسىپورىن ەكونوميكاسىنا وڭ اسەرىن تيگىزەدى، سوندىقتان وتكەن جىلداعىداي كارانتين شارالارىن ەنگىزۋدىڭ قاجەتتىلىگى بولمايدى دەپ ويلايمىن، - دەيدى «شين-لاين» جشس باس ديرەكتورى ۆلاديمير پاك.

ال بالقاش اۋدانىندا «Dinara – Ranch» اگروفيرماسى» جشس جانە «دينارا» وندىرىستىك كووپەراتيۆىنىڭ 163 قىزمەتكەرى دە ەكپە سالدىردى.

- ۆاكتسيناتسيا سالدىرۋ نە سالدىرماۋ – اركىمنىڭ ءوز ەركىندە. ەكپە ناۋقانى باستالعان كەزدە ءبىز قىزمەتكەرلەر اراسىندا ءتۇسىندىرۋ جۇمىسىن وتكىزىپ، ونىڭ ارتىقشىلىقتارى مەن قارسى كورسەتىلىمدەرى تۋرالى ايتتىق. كوپتەگەن جۇمىسشى ءوزىن قاۋىپسىز سەزىنۋى ءۇشىن ۆاكتسينا ەگۋ تۋرالى شەشىم قابىلدادى. ءبىز قىزمەتكەرلەردىڭ تاڭداۋىن قولداي وتىرىپ، ۇجىمدىق يممۋنيتەتتىڭ قالىپتاسۋى ارقاسىندا پاندەميانى بەتىن بەرى قاراتا الامىز دەپ سانايمىز، - دەدى «Dinara-Ranch» اگروفيرماسى» جشس باس ديرەكتورى باقىت اتايبەكوۆ.

پانفيلوۆ اۋدانىندا قازاقستان مەن تمد-داعى ءىرى كراحمال-سىرنە زاۋىتى «جاركەنت كراحمال-سىرنە زاۋىتى» جشس كاسىپورىن بازاسىندا 600-دەن استام قىزمەتكەرگە COVID-19-عا قارسى ۆاكتسيناتسيالاۋدى ۇيىمداستىردى. زاۋىت وكىلدەرىنىڭ ايتۋىنشا، كاسىپورىن قىزمەتكەرلەرىنىڭ قاۋىپسىزدىگى مەن ەكونوميكالىق تۇراقتىلىعى «ۋنيۆەرسال» كومپانيالار توبىنىڭ باستى باسىمدىقتارىنىڭ ءبىرى بولىپ تابىلادى.
سونىمەن بىرگە، ەكپە ەگۋ ناۋقانىنا «Food Master» جشس، «اdal» جشس، «Astory» جشس، «Kagazy Recycling» جشس، «Efes Kazakhstan» جشس، «قازگەر» جشس، «سكتب گرانيت» جشس، «Kaz Glass Company» جشس، «الاتاۋ قۇس» اق جانە باسقا دا كوپتەگەن ءىرى ونەركاسىپتىك كاسىپورىندار بەلسەندى تۇردە قوسىلدى.

الماتى وبلىسىنىڭ باس مەملەكەتتىك سانيتارلىق دارىگەرى ەرعالي سىدىمانوۆ اتاپ وتكەندەي، ايماقتا ۆاكتسينادان كەيىنگى رەاكتسيالار مەن اسقىنۋلار تىركەلگەن جوق. جالپى  الماتى وبلىسىندا 239 ەگۋ پۋنكتى، 134 كوشپەلى بريگادا ازىرلەنگەن. ءار پۋنكتتىڭ وتكىزۋ قابىلەتى - 7 مىڭنان استام ادامدى قۇرايدى.

پىكىرلەر
ۇقساس جاڭالىقتار