بيىل اۋقىمدى سۋ تاسقىنى كۇتىلمەيدى. دەگەنمەن قاتتى جاۋىن-شاشىن بولعان جاعدايدا سۋ باسۋى مۇمكىن بىرقاتار وڭىرلەر بار. بۇل تۋرالى ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ مالىمدەدى، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.
"قازگيدرومەت" مالىمەتىنە سۇيەنسەك، بيىل 2015, 2017 جىلدارى بولعانداي اۋقىمدى سۋ تاسقىنى كۇتىلمەيدى. اۋا رايىنىڭ كۇرت وزگەرۋى جانە قاتتى جاۋىن-شاشىن بولعان جاعدايدا قاراعاندى، اقمولا، سولتۇستىك قازاقستان، قوستاناي، الماتى، تۇركىستان، جامبىل جانە شىعىس قازاقستان وبلىستارىن جەرگىلىكتى سۋ باسۋ قاۋپى بار", - دەدى قوجانيازوۆ وكق بريفينگىندە.
ونىڭ ايتۋىنشا، قازىر رەسپۋبليكانىڭ بارلىق اۋماعىندا قار قارقىندى ەرىپ جاتىر.
"قار قىزىلوردا، ماڭعىستاۋ وبلىستارىندا، سونداي-اق الماتى، تۇركىستان جانە جامبىل وبلىستارىنىڭ جازىق بولىگىندە تولىق ەرىپ كەتتى. الايدا جازىقتا ورنالاسقان ەلدى مەكەندەردە سۋ باسۋ قاۋپى تەك كوكتەمگى كەزەڭدە عانا بولسا، تاۋلى جەرلەردە سۋ تاسقىنى قاۋپى تاۋلاردا قار ەرىگەندە جانە قاتتى جاۋىن-شاشىن بولعاندا تۋىندايدى", - دەپ ەسكەرتتى قوجانيازوۆ.
