دارىندىلىق – نازاردى تالعامپاز تاڭداۋعا لايىقتى وبەكتىلەرگە اۋدارتا ءبىلۋ، جادتان اسەرلەردى الىپ شىعۋ، ولاردى شىعارماشىلىق قيال ۇسىناتىن اسسوتسياتسيا مەن بايلانىستار جۇيەسىنە ەنگىزۋ. ءار ادامنىڭ بويىندا ءتۇرلى دارىن بار. دەسە دە ونى تولىق ۇستاي الۋ – ونەر. ناعىز ىسمەر، #kairataisulu برەندىنىڭ نەگىزىن قالاۋشى ايسۇلۋ قۇرمانبەكقىزىنىڭ بويىنداعى تالانت جايلى كەيىپكەرىمىزدىڭ وزىمەن اڭگىمەمىزدى جالعاستىرساق.
- بۇل برەند باسىندا جاي عانا حوببي رەتىندە باستالدى. نەگىزگى ماماندىعىم – ينجەنەر. ۇيدە دەكرەتتىك دەمالىستا وتىرعان كەزىمدە سومكەلەردى قىزىعۋشىلىق رەتىندە تىگىپ باستادىم. مىنە، 4 جىلدان اسا ۋاقىت ءوتتى، قازىر نۇر-سۇلتان قالاسىندا كىشىگىرىم شەبەرحانامىز بار. سول جەردە سومكەلەرىمىزدى ساتامىز. الەۋمەتتىك جەلىدە ينستاگرام پاراقشاسىن جۇرگىزەمىز. تاپسىرىس قابىلداپ، قازاقستانعا ايگىلى، اتاقتى انشىلەرمەن، تەلەجۇرگىزۋشى، بلوگەرلەرمەن جۇمىس جاسايمىز. قاسىمدا بىرگە قىزمەت اتقاراتىن ەكى كومەكشىم بار.
سومكەلەر بىزدە ەكسكليۋزيۆتى، قازاقشا ناقىشپەنەن، ويۋمەن، ۆينتاجدى جانە زاماناۋي ستيلدە. سونداي-اق، سومكەلەر باستان-اياق قولدان تىگىلەدى.
- شابىت – ويدىڭ انىقتىعىنىڭ، جۇمىسىنىڭ قارقىندىلىعىنىڭ، ومىرلىك جانە كوركەم تاجىريبەنىڭ قۋاتتى تۇردە «سىرتقا شىعارىلۋىنىڭ» جانە ونىڭ تىكەلەي شىعارماشىلىققا قوسىلۋىنىڭ ايرىقشا شىعارماشىلىق احۋالى، فورمانى ەرەكشە سەزىنۋىندەگى اسقان شەبەرلىك. بۇل دا ونەردىڭ ءبىر ءتۇرى بولعاندىقتان مىندەتتى تۇردە شابىت كەرەك. ءارتۇرلى ەسكيزدەردى جاسار الدىندا نەدەن شابىتتاناسىز؟
- قولىم تيسە، تابيعات اياسىنا شىعۋعا تىرىسامىن. شابىت دەگەن قىزىق دۇنيە عوي. شابىت كەلگەن كەزدە سەن ۇيىقتاپ جاتساڭ دا مەيلى، قانداي ىسپەن اينالىسساڭ دا قيالدىڭ جەتەگىنە ەرىپ كەتەسىڭ. مىسالى، مەن ءوزىم شابىتتانىپ تۇرسام بىردەن قالام مەنەن قاعازدى قولعا الىپ، سول ويعا كەلىپ تۇرعان، ەسكە ءتۇسىپ تۇرعان سومكەلەردىڭ بەينەسىن نەمەسە تىگىستەردى ناقتىلاپ قاعازعا ءتۇسىرىپ الۋعا تىرىسامىن. ءبىز سومكەنىڭ بەتىن ارلەيتىن بولعاندىقتان، كوز الدىما كەلگەن تۇستەردى ەسىمە بىردەن ساقتاپ الۋعا بار كۇشىمدى سالامىن.
- سومكە مودەلدەرىنىڭ ءپىشىنىن، كولەمىن تاپسىرىس بەرۋشىلەردىڭ وزدەرى ايتا ما، الدە سىزدەردەن ۇسىنىس كۇتە مە؟
- سومكەنىڭ ولشەم بىرلىگىن ارينە تاپسىرىس بەرۋشى ايتادى. الايدا، ءبىز ول سومكەگە پروفەسسيونالدى كوزقاراسىمىزدى ءبىلدىرىپ وتىرامىز. قالاي جاساعان دۇرىس بولادى دەپ، جۇمىسىمىزدان شەت قالدىرمايمىز. سول سەبەپتى، تاپسىرىس بەرۋشىمەن ءاردايىم ورتاق شەشىمدە بولامىز.
- سومكە ءۇشىن تۇستەردى ءبىر-بىرىمەن ۇيلەستىرە ءبىلىپ، ماتانى دۇرىس تاڭداۋ – ۇلكەن شەبەرلىك. ماتا، اشەكەيلەردى ارنايى تاپسىرىسپەن الدىراسىزدار ما؟
- ءيا، ارنايى دۇكەندەردەن ماتالاردى تاپسىرىسپەن الدىرىپ جاتامىز. مىسالىعا، ارلەۋ ءۇشىن «كيشما» دەگەن دۇنيە كەرەك بولادى. ول – فۋرنيتۋرا. كەيدە ينديادان ارنايى الدىرتامىز. قولونەرى بولعاندىقتان، كوبىنەسە بارلىعىن ءوزىمىز جاسايمىز.
- وزگە قالالاردا ماستەر-كلاسس ساباقتارىن وتكىزىپ تۇراسىز. قاتىسۋ ءۇشىن ءوتىنىش حاتتار دا ءجيى كەلەتىن شىعار. قازىر پاندەمياعا بايلانىستى ساباقتاردى ونلاين جۇيەدە وتكىزەسىز بە، الدە توقتاتىپ قويدىڭىز با؟
- بۇرىن وزگە قالالاردا ماستەر-كلاسس وتكىزگەن بولاتىنمىن. ول – كوبىنەسە سۇرانىس بويىنشا: الماتى، شىمكەنت قالالارى. بىراق پاندەمياعا بايلانىستى، وكىنىشكە وراي، ەشقانداي ماستەر-كلاسس وتكىزىپ جاتقان جوقپىن. ونلاين ماستەر-كلاستار دا ۋاقىتشا توقتاتىلىپ قويدى.
- الداعى ۋاقىتقا قانداي جوسپارلارىڭىز بار؟ شەبەرحانا سانىن كوبەيتۋ سەكىلدى؟
- ارينە، الداعى ۋاقىتقا جوسپارلار وتە كوپ! الدىمەن ىشكى نارىقتى قامتاماسىز ەتۋ كەرەك. ودان كەيىن شەت ەلدەرگە شىعۋ. قازاعىمىزدىڭ ويۋ-ورنەگىن الەمگە پاش ەتۋ.
- جاۋاپتارىڭىزعا كوپ راحمەت! ۇلتتىق قۇندىلىعىمىزدى ءار قىرىنان دارىپتەيتىن وزىڭىزدەي جاندار كوبەيە بەرسىن دەمەكپىز.
ايدانا بەيسەن،
"ادىرنا" ۇلتتىق پورتالى
