Daryndylyq – nazardy talǵampaz tańdaýǵa laıyqty obektilerge aýdarta bilý, jadtan áserlerdi alyp shyǵý, olardy shyǵarmashylyq qııal usynatyn assoıaııa men baılanystar júıesine engizý. Ár adamnyń boıynda túrli daryn bar. Dese de ony tolyq ustaı alý – óner. Naǵyz ismer, #kairataisulu brendiniń negizin qalaýshy Aısulý Qurmanbekqyzynyń boıyndaǵy talant jaıly keıipkerimizdiń ózimen áńgimemizdi jalǵastyrsaq.
- Bul brend basynda jaı ǵana hobbı retinde bastaldy. Negizgi mamandyǵym – ınjener. Úıde dekrettik demalysta otyrǵan kezimde sómkelerdi qyzyǵýshylyq retinde tigip bastadym. Mine, 4 jyldan asa ýaqyt ótti, qazir Nur-Sultan qalasynda kishigirim sheberhanamyz bar. Sol jerde sómkelerimizdi satamyz. Áleýmettik jelide ınstagram paraqshasyn júrgizemiz. Tapsyrys qabyldap, Qazaqstanǵa áıgili, ataqty ánshilermen, telejúrgizýshi, blogerlermen jumys jasaımyz. Qasymda birge qyzmet atqaratyn eki kómekshim bar.
Sómkeler bizde eksklıýzıvti, qazaqsha naqyshpenen, oıýmen, vıntajdy jáne zamanaýı stılde. Sondaı-aq, sómkeler bastan-aıaq qoldan tigiledi.
- Shabyt – oıdyń anyqtyǵynyń, jumysynyń qarqyndylyǵynyń, ómirlik jáne kórkem tájirıbeniń qýatty túrde «syrtqa shyǵarylýynyń» jáne onyń tikeleı shyǵarmashylyqqa qosylýynyń aıryqsha shyǵarmashylyq ahýaly, formany erekshe sezinýindegi asqan sheberlik. Bul da ónerdiń bir túri bolǵandyqtan mindetti túrde shabyt kerek. Ártúrli eskızderdi jasar aldynda neden shabyttanasyz?
- Qolym tıse, tabıǵat aıasyna shyǵýǵa tyrysamyn. Shabyt degen qyzyq dúnıe ǵoı. Shabyt kelgen kezde sen uıyqtap jatsań da meıli, qandaı ispen aınalyssań da qııaldyń jetegine erip ketesiń. Mysaly, men ózim shabyttanyp tursam birden qalam menen qaǵazdy qolǵa alyp, sol oıǵa kelip turǵan, eske túsip turǵan sómkelerdiń beınesin nemese tigisterdi naqtylap qaǵazǵa túsirip alýǵa tyrysamyn. Biz sómkeniń betin árleıtin bolǵandyqtan, kóz aldyma kelgen tústerdi esime birden saqtap alýǵa bar kúshimdi salamyn.
- Sómke modelderiniń pishinin, kólemin tapsyrys berýshilerdiń ózderi aıta ma, álde sizderden usynys kúte me?
- Sómkeniń ólshem birligin árıne tapsyrys berýshi aıtady. Alaıda, biz ol sómkege professıonaldy kózqarasymyzdy bildirip otyramyz. Qalaı jasaǵan durys bolady dep, jumysymyzdan shet qaldyrmaımyz. Sol sebepti, tapsyrys berýshimen árdaıym ortaq sheshimde bolamyz.
- Sómke úshin tústerdi bir-birimen úılestire bilip, matany durys tańdaý – úlken sheberlik. Mata, áshekeılerdi arnaıy tapsyryspen aldyrasyzdar ma?
- Iá, arnaıy dúkenderden matalardy tapsyryspen aldyryp jatamyz. Mysalyǵa, árleý úshin «kıshma» degen dúnıe kerek bolady. Ol – fýrnıtýra. Keıde Indııadan arnaıy aldyrtamyz. Qolóneri bolǵandyqtan, kóbinese barlyǵyn ózimiz jasaımyz.
- Ózge qalalarda master-klass sabaqtaryn ótkizip turasyz. Qatysý úshin ótinish hattar da jıi keletin shyǵar. Qazir pandemııaǵa baılanysty sabaqtardy onlaın júıede ótkizesiz be, álde toqtatyp qoıdyńyz ba?
- Buryn ózge qalalarda master-klass ótkizgen bolatynmyn. Ol – kóbinese suranys boıynsha: Almaty, Shymkent qalalary. Biraq pandemııaǵa baılanysty, ókinishke oraı, eshqandaı master-klass ótkizip jatqan joqpyn. Onlaın master-klastar da ýaqytsha toqtatylyp qoıdy.
- Aldaǵy ýaqytqa qandaı josparlaryńyz bar? Sheberhana sanyn kóbeıtý sekildi?
- Árıne, aldaǵy ýaqytqa josparlar óte kóp! Aldymen ishki naryqty qamtamasyz etý kerek. Odan keıin shet elderge shyǵý. Qazaǵymyzdyń oıý-órnegin álemge pash etý.
- Jaýaptaryńyzǵa kóp rahmet! Ulttyq qundylyǵymyzdy ár qyrynan dáripteıtin ózińizdeı jandar kóbeıe bersin demekpiz.
Aıdana BEISEN,
"Adyrna" ulttyq portaly
