تۇركيادا 3-ءساۋىر كۇنى تەڭىز-اسكەري كۇشتەرىنىڭ 103 زەينەتتەگى ادميرالى ەردوعاننىڭ پارتياسىن "مونترە كونۆەنتسياسىن تالقىلاعانى ءۇشىن" جانە اسكەردە "يسلاميزاتسيا" جۇرگىزگەنى ءۇشىن ايىپتادى. « ستامبۇل كانالىن سالۋ ءۇشىن دە، حالىقارالىق كەلىسىمدەردىڭ كۇشىن جويۋ ءۇشىن دە مونترە كونۆەنتسياسىنىڭ اشىق تالقىلانىپ جاتقانى ءبىزدىڭ الاڭداۋشىلىعىمىزدى تۋىنداتۋدا»، — دەگەن وي بىلدىرگەن ادميرالدار. بۇل تۋرالى Ahval پورتالى مالىمدەدى.
مونترە كونۆەنتسياسىنا 1936 جىلى شۆەيتساريادا قول قويىلدى. كونۆەنتسيا نەگىزىندە تۇركيا قارا تەڭىز بۇعاسىن، بوسفور مەن داردانەللانى باقىلاۋىندا ۇستاپ، اسكەري كەمەلەردىڭ ءوتۋىن شەكتەپ كەلگەن بولاتىن. ادميرالدار بۇل كونۆەنتسيانى تۇركيانىڭ ديپلوماتياسىنداعى ەڭ ءىرى جەڭىستىڭ ءبىرى دەپ اتادى. ەردوعاننىڭ ساياساتىنا قارسىلىق بىلدىرگەن ادميرالدار ءدال وسى كونۆەنتسيا تۇركياعا ەكىنشى دۇنيەجۇزىلىك سوعىستا بەيتاراپتىق ساقتاۋىنا اسەر ەتكەنىن اتاپ وتكەن.
تۇركيا باسشىسى ەردوعان "ستامبۇل" كانالىن سالۋدى قولداپ وتىر. ول بۇل كانال ارقىلى ەكولوگيالىق قاۋپى جوعارى جۇك تاسيتىن كەمەلەر، مۇناي تاسۋشى تانكەرلەر وتەتىنىن دە مالىمدەدى. الايدا اسكەريلەردى الاڭداتىپ وتىرعانى سول، كانال ارقىلى اسكەري كەمەلەردىڭ وتۋىنە رۇقسات ەتىلۋى مۇمكىن. بۇل مونترە كونۆەنتسياسىنىڭ پرينتسيپتەرىنە قاراما-قايشى بولىپ كەلەدى.
ء"بىز مونترە كونۆەنتسياسىن تالقىلاۋعا رۇقسات بەرەتىن كەز كەلگەن باستامادان باس تارتۋعا شاقىرامىز. كونۆەنتسيا تۇركيانىڭ ءومىر ءسۇرۋى جانە دامۋى ءۇشىن اسا ماڭىزدى. سونىمەن بىرگە ءبىزدىڭ اسكەرىمىز بەن تەڭىز-اسكەري كۇشتەرى FETO (گۇلەنشىلەر) تاراپىنان قاساقانا شابۋىلعا ۇشىراپ، سونىڭ سالدارىنان كاسىبي مامانداردى جوعالتتىق.
وسىنىڭ بارلىعى بىزگە قارۋلى كۇشتەر كونستيتۋتسيالىق قۇندىلىقتاردى قاتاڭ ۇستاۋ كەرەكتىگىن كورسەتەدى.
سوندىقتان دا ءبىز اسكەرىمىز بەن تەڭىز-اسكەري كۇشتەرىنىڭ مۇستافا كەمال اتاتۇرىك سالىپ كەتكەن قۇندىلىقتار باعىتىنان تايقىپ كەتكەندەي اسەر قالدىراتىن ارەكەتتەردى ايىپتايمىز. ونداي بولعان جاعدايدا تۇرىك رەسپۋبليكاسى ىشكى تۇراقسىزدىقتار مەن ۇلكەن قاتەرگە تاپ كەلۋى مۇمكىن", - دەگەن ادميرالدار.
ادميرالداردىڭ بۇل قارسىلىعى ەردوعاندى ايىپتاۋ رەتىندە كورىنىپ، ولاردى تەكسەرۋ جۇمىستارى باستالىپ كەتتى.
اسحات قاسەنعالي،
"ادىرنا" ۇلتتىق پورتالى
