اتىراۋدا دەسترۋكتيۆتى اعىم وكىلدەرىنە 400 مىڭ تەڭگەدەن استام ايىپپۇل سالىندى دەپ جازادى «ادىرنا» ۇلتتىق پورتالى ايقىن باسىلىمىنا سىلتەمە جاساپ.
ايىپپۇل ارقالاعاندار مەشىتتەگى ناماز كەزىندە «ءاۋمين» ءسوزىن بارىنشا داۋىستاپ ايتقان. «ءاۋميندى» ناماز كەزىندە داۋىستاپ ايتۋ تەك دەسترۋكتيۆتى اعىم وكىلدەرىنە ءتان.
اتىراۋ وبلىسى قىزىلقوعا اۋدانى ساعىز سەلوسىنداعى «ابدوللا حازىرەت» مەشىتىندە تاڭ نامازى كەزىندە 3 بىردەي ازامات «ءاۋمين» ءسوزىن داۋىستاپ ايتقان. مەشىت يمامىنىڭ ناماز كەزىندە «اۋمين» ءسوزىن قاتتى ايتۋعا بولمايتىندىعى تۋرالى ەسكەرتپەسىنە قاراماستان، اقتوبە قالاسىنىڭ جاس تۇرعىندارى مۇنداي قادامعا بارعان. بۇل جونىندە مەشىت يمامى پوليتسياعا حابارلاما ءتۇسىردى.
ولارعا قاتىستى قر اقبتك 490-بابىنىڭ 2-بولىگىمەن اكىمشىلىك حاتتاما تولتىرىلىپ، ايىپپۇل سالىندى. سونىمەن قاتار اتالعان ۇشتىك اتىراۋ وبلىسى پوليتسيا دەپارتامەنتى ەكسترەميزمگە قارسى كۇرەس باسقارماسىنىڭ «دەسترۋكتيۆتى ءدىني اعىم جاقتاۋشىسى» رەتىندە تىزىمدىك ەسەپتە تۇرعانى بەلگىلى بولدى.
وسىعان ۇقساس وقيعا يندەر اۋدانىندا ورنالاسقان «ءايىپ-قاجى» مەشىتىندە دە بولدى. ورال قالاسىنىڭ 28 جاستاعى تۇرعىنى كەشكى ناماز ۋاقىتىندا «ءاۋمين» ءسوزىن داۋىستاپ ايتقان.
اتالعان قۇقىقبۇزۋشىلىققا قاتىستى قر اقبتك 490-بابىنىڭ 2-بولىگىمەن اكىمشىلىك حاتتاما تولتىرىلىپ، 102095 تەڭگە كولەمىندە ايىپپۇل سالىندى. اتىراۋ وبلىسى پوليتسيا دەپارتامەنتى ەكسترەميزمگە قارسى كۇرەس باسقارماسى «قر ءدىني قىزمەت جانە ءدىني بىرلەستىكتەر تۋرالى» زاڭناماسىنا سايكەس، مەشىتكە كەلۋشىلەر ونىڭ تالاپتارى مەن ەرەجەلەرىن ساقتاۋعا مىندەتتى ەكەندىگىن ەسكەرتەدى.
قازىرگى تاڭدا اتىراۋدا مەشىتتە ءتارتىپ بۇزعاندارعا 408 مىڭ 380 تەڭگە ايىپپۇل سالىندى.
