«ارسەلورميتتال تەمىرتاۋ» كومپانياسىنا 5,5 ميلليون تەڭگە ايىپپۇل سالىندى. بۇل تۋرالى تابيعي مونوپوليالاردى رەتتەۋ كوميتەتىنىڭ قاراعاندى وبلىسى بويىنشا دەپارتامەنتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
باسقارما تەمىرتاۋ قالاسى كاسىپكەرلەرىنىڭ ۇجىمدىق ءوتىنىشى نەگىزىندە «ارسەلور ميتتال تەمىرتاۋعا» قاتىستى جوسپاردان تىس تەكسەرۋ جۇرگىزگەنىن مالىمدەدى. ناتيجەسىندە كومپانيا كاسىپكەرلەرلىك نىسانداردى جىلۋ جەلىلەرىنەن زاڭسىز اجىراتقانى بەلگىلى بولدى.
«تەمىرتاۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىنىڭ 2023 جىلعى 5 قازانداعى قاۋلىسىمەن «تابيعي مونوپوليالار تۋرالى» قازاقستان رەسپۋبليكاسىنىڭ زاڭىن بۇزعانى ءۇشىن، «ارسەلور ميتتال تەمىرتاۋ» اق-نا 5 520 000 تەڭگە مولشەرىندە ايىپپۇل تۇرىندە اكىمشىلىك جازا قولدانىلىپ، اكىمشىلىك جاۋاپكەرشىلىككە تارتىلدى»، - دەلىنگەن كوميتەت حابارلاماسىندا.
كومپانيا اكىمشىلىك جاۋاپكەرشىلىكتەن بولەك، قىلمىستىق جاۋاپكەرشىلىككە دە تارتىلۋى مۇمكىن.
ەسكە سالايىق، 17 تامىزدا «ارسەلورميتتال تەمىرتاۋ» كومىر دەپارتامەنتىنە قاراستى «قازاقستان» شاحتاسىندا كونۆەيەر لەنتاسى ورتەنگەن ەدى. ءورت سالدارىنان بەس كەنشى دە قازا تاپتى. قازىرگى تاڭدا پوليتسيا 277-بابىنىڭ 2-بولىگى (تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ) بويىنشا سوتقا دەيىنگى تەرگەۋ جۇمىستارىن جۇرگىزىپ جاتىر.
ۇقساس جاڭالىقتار
