اناسى مەن قىزى قالتا ۇرلىعىمەن اينالىسقان

1672

تۇركىستان وبلىسىندا قالتا ۇرلىعىمەن اينالىسىپ جۇرگەن اناسى مەن قىزى ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.

ماقتاارال اۋدانىنىڭ پب كەزەكشى بولىمىنە بىرنەشە جەرگىلىكتى تۇرعىن ارىزدانعان. جابىرلەنۋشى ازاماتشالاردىڭ ايتۋىنشا، كۇندىز ماقتاارال اۋدانى اتاكەنت كەنتىنىڭ كوشەلەرىنىڭ بىرىندە ورنالاسقان بازار اۋماعىندا قالتا ۇرىلارىنا تاپ بولعان. ولاردىڭ ءبىرىنىڭ ىشىندە 200 مىڭ تەڭگەسى مەن بانك كارتوچكالارى سالىنعان ءاميانىن، ەندى ءبىرىنىڭ ىشىندە 10 000 تەڭگە اقشاسى بار ءاميانىن بەلگىسىز بىرەۋلەر قولدى ەتكەن.

ءتارتىپ ساقشىلارى بۇل جايتتى قر قك-ءنىڭ 188-بابى (ۇرلىق) بويىنشا تىركەدى. اۋدان پوليتسەيلەرى قىلمىستىڭ ءىزىن سۋىتپاي اشۋ ماقساتىندا جەدەل-ىزدەستىرۋ ءىس-شارالارىن جۇرگىزدى. اينالانى باقىلاپ، بەينەكامەرالاردى ءجىتى تەكسەردى. ناتيجەسىندە كۇدىك تۋدىرعان ەكى ايەلدى بايقاعان.

كۇدىكتى ايەلدەر اناسى مەن قىزى بولىپ شىقتى. تەكسەرۋ بارىسىندا ولاردىڭ شىمكەنت قالاسىنىڭ تۇرعىندارى ەكەنى انىقتالدى. قازىرگى تاڭدا ءوز كىنالارىن تولىق مويىنداعان قالتا ۇرىلارىنا قاتىستى تەرگەپ-تەكسەرۋ امالدارى جۇرگىزىلۋدە.

تەرگەۋ بارىسىندا كۇدىكتىلەردىڭ الدىن الا ءسوز بايلاسىپ، وڭاي جولمەن اقشا تابۋدى كوزدەگەنى انىقتالدى. وسىلايشا ەكەۋى ادام كوپ شوعىرلاناتىن ايماقتاردى ءبىر شولىپ شىعىپ، بازار ماڭىندا ادامداردىڭ ىعى-جىعى بولىپ جاتقانىن كورىپ، جابىرلەنۋشىلەردىڭ سومكەلەرىنەن بىلدىرتپەستەن ءامياندارىن الىپ كەتكەن. ولار قىلمىستىق جولمەن تابىلعان قاراجاتتى ءوز قاجەتتىلىكتەرىنە جۇمساپ ۇلگەرگەن.

«ادىرنا» ۇلتتىق پورتالى

پىكىرلەر
رەداكتسيا تاڭداۋى