28-ناۋرىز كۇنى وزبەكستان استاناسى تاشكەنت قالاسىنداعى ءامىر تەمىر داڭعىلىنىڭ بويىندا 3-4 ازامات كوشەدە كەتىپ بارا جاتقان قىز بەن جىگىتتى لگبت وكىلدەرى دەپ ويلاپ، ولارعا شابۋىل جاساعان. بۇل تۋرالى روليكتەر ينتەرنەت جەلىسىندە تەز تاراپ كەتتى.
"وزبەكستان جاڭعىرىعى" Telegram كانالى ءبىر توپ ەر ازاماتتىڭ جول جيەگىندە ۇرانداتىپ بارا جاتقانىن كورسەتكەن. بەينەروليك اۆتورلارى ازاماتتار 26-ناۋرىزدا تاشكەنتتە ءبىر توپ جاستىڭ انيمە جانكۇيەرلەرى رەتىندە باس قوسۋىنا قارسىلىق ءبىلدىرىپ، كوشەگە شىققان دەپ اتادى. جەرگىلىكتى باق-تىڭ حابارلاۋىنشا ميتينگكە 70 شاقتى ازامات قاتىسقان.
قۇقىق قورعاۋ ورگاندارى ءتارتىپ بۇزعان 12 ازاماتتى ۇستاعان. ولارعا "بۇزاقىلىق" بابى بويىنشا ايىپ تاعىلعان. جەرگىلىكتى پوليتسيا وكىلدەرى قىز بەن جىگىتتى 3-4 ازامات سوققىعا جىقپاق بولعانىن، ولاردىڭ بۇل ارەكەتىن قولداپ، 20-25 جىگىتتىڭ تارتىپسىزدىككە قوسىلعانىن ايتتى. بارلىق قورعاۋ شارالارىنا قاراماستان سول كۇنى كەشكە انيمە كەشىن ۇيىمداستىرماق بولعان تانىمال بلوگەر ميرازيز بازاروۆ سوققىعا جىعىلدى.
اسحات قاسەنعالي،
"ادىرنا" ۇلتتىق پورتالى
