الماتى قالاسى ءماسليحاتىنىڭ دەپۋتاتى ەرماحان يبرايموۆ جاڭا قىزمەتكە ورنالاستى. 2000 جىلعى سيدنەي وليمپيادا ويىندارىنىڭ چەمپيونى حالىقارالىق بوكس قاۋىمداستىعىنىڭ (AIBA) باسقارۋ ورگاندارىنا قوسىلدى. بۇل تۋرالى قازاقستان بوكس فەدەراتسياسىنىڭ ءباسپاسوز قىزمەتى مالىمدەدى، دەپ حابارلايدى "ادىرنا" ءتىلشىسى.
حالىقارالىق بوكس قاۋىمداستىعى (AIBA) ەكى قازاقستاندىقتى ءوزىنىڭ باسقارۋ ورگاندارىنىڭ مۇشەلەرى ەتىپ تاعايىندادى. ديرەكتورلار كەڭەسىنىڭ داۋىس بەرۋ قورىتىندىسى بويىنشا، قازاقستاندىق بوكس فەدەراتسياسىنىڭ مەنەدجەرى مەيرام نۇرتازين جارىستاردى وتكىزۋ جونىندەگى كوميسسيانىڭ مۇشەسى بولدى. ال سيدنەي وليمپيادا چەمپيونى، وليمپياداعا دايىندىق ورتالىعىنىڭ ديرەكتورى ەرماحان يبرايموۆ چەمپيوندار مەن ارداگەرلەر جونىندەگى كوميسسيانىڭ مۇشەسى بولدى.
AIBA پرەزيدەنتى ۋمار كرەملەۆ جاڭادان تاعايىندالعان قازاقستاندىقتارعا حاتتار جىبەردى. ءوزىنىڭ حابارلامالارىندا ول، ولاردىڭ ءبىلىمى مەن تاجىريبەسى ۇيىمنىڭ دامۋىنا قۇندى ۇلەس بولاتىنىنا سەنىم ءبىلدىردى جانە ءبىر-بىرىمەن تانىسۋعا، بىرلەسىپ جۇمىس ىستەۋگە كىرىسۋ مۇمكىندىگىن كۇتكەنىن اتاپ ءوتتى.
ازيا بوكس كونفەدەراتسياسى دا تاعايىنداۋلارعا بايلانىستى نۇرتازين مەن يبرايموۆقا قۇتتىقتاۋ جولدادى. بۇل 2018-2019 جىلعى ۇزىلىستەن كەيىن AIBA-نىڭ باسقارۋ ورگاندارىنا تاعايىندالعان العاشقى قازاقستاندىقتار. 2014-2017 جىلدار ارالىعىندا كوميسسيالاردا التى جەرلەسىمىز جۇمىس ىستەدى. 2019 جىلى ۇيىمداعى رەفورمالارعا بايلانىستى بارلىق كوميسسيالار تاراتىلىپ، قازىر جاڭادان قۇرىلىپ جاتىر.
الايدا، ەرماحان يبرايموۆ جاڭا قىزمەتكە اۋىسىپ جاتسا دا، "ادىرنا" تىلشىسىنە ءوزىنىڭ دەپۋتاتتىقتان كەتپەگەنىن ايتتى.
"ادىرنا" ۇلتتىق پورتالى
