اقمولا وبلىسى بەلسەندى ءومىر سالتىن ۇستانۋشىلاردىڭ باسىن قوساتىن ورتالىقتاردىڭ ءبىرى ەكەنىن تاعى ءبىر مارتە دالەلدەپ، بەسىنشى مەرەيتويلىق ZERENDA HALF MARATHON حالىقارالىق مارافونىن قابىلدادى. وعان الەمنىڭ تۇكپىر-تۇكپىرىنەن سپورتشىلار قاتىستى.
«قىسقا ۋاقىت ىشىندە بۇل مارافون حالىقارالىق مارتەبەگە يە بولدى. بيىل جارىسقا 11 ەلدەن 1,5 مىڭعا جۋىق سپورت اۋەسقويى تىركەلدى. قاتىسۋشىلاردىڭ بارلىق تىلەكتەرىن ەسكەرىپ، بالالار جارىسىنان باستاپ، جارتىلاي مارافون جانە 30 شاقىرىمدىق جۇگىرۋگە دەيىن ءتۇرلى قاشىقتىقتار ازىرلەندى. ايتا كەتۋ كەرەك، سوڭعى ءبىر جىلدا وبلىس اۋماعىندا 50-دەن استام بالالار سپورت الاڭى جانە 13 ءىرى سپورت نىسانى سالىندى»، - دەدى اقمولا وبلىسى اكىمىنىڭ ورىنباسارى دوسۇلان ايتباەۆ.
جارىس باعىتى زەرەندى كولىن اينالا قورشاعان اسفالتتالعان جولدارمەن، قىراتتار مەن ورمانداردىڭ اراسىمەن ءوتتى. بيىل زەرەندىدە مارافون بەسىنشى رەت ۇيىمداستىرىلدى. سپورتتىق شاراعا قاتىسۋشىلار سانى جىل سايىن ارتىپ، ءارتۇرلى جاستاعى بەلسەندى ءومىر سالتىن ۇستانۋشىلاردىڭ قىزىعۋشىلىعىن ارتتىرىپ كەلەدى. بيىلعى جارىستىڭ ەڭ جاس قاتىسۋشىسى 6 جاستا بولسا، ەڭ ەگدە سپورتشىنىڭ جاسى 77-دە.
جارىستاعى جەڭىمپازداردىڭ قۋانىشى مەن سپورتتىق تارتىس مەرەكەلىك كوڭىل كۇيدى ايشىقتاي ءتۇستى. جارىس جەڭىمپازدارىنىڭ ءبىرى ەرلان تايتلەۋوۆ ءوز اسەرىمەن ءبولىستى.
«مەن استانادان كەلدىم. بۇل مەن ءۇشىن كۇتپەگەن ناتيجە بولدى. ءوزىم شاڭعى سپورتىمەن اينالىسامىن. سوڭعى ءۇش-ءتورت جىلدا مارافوندارعا بەلسەندى قاتىسا باستادىم. باستاپقى ماقساتىم العاشقى بەستىككە كىرۋ ەدى. الايدا مارەگە جاقىنداعاندا ادرەنالينمەن جىلدامدىقتى ارتتىرىپ، ءبىرىنشى بولىپ كەلدىم. وسىنداي كورىكتى جەردە جۇگىرۋ - ەكى ەسە ءلاززات. ۇيىمداستىرۋشىلارعا جانە باسقا سپورتشىلارعا راقمەت. اتموسفەراسى كەرەمەت»، - دەدى ەرلان تايتلەۋوۆ.
