قايرات ءساتجانوۆ بوكستان قازاقستان ەرلەر قۇراماسىنىڭ باس باپكەرى بولىپ تاعايىندالدى. بۇل تۋرالى قازاقستان بوكس فەدەراتسياسى مالىمدەدى، دەپ حابارلايدى “ادىرنا” ۇلتتىق پورتالى.
«قازىرگى ۋاقىتتا جاڭا جاتتىقتىرۋشىلار قۇرامى جاساقتالۋدا، ونىڭ ىشىندە: شەتەلدىك كەڭەسشى جاتتىقتىرۋشىلار، دەنە شىنىقتىرۋ بويىنشا جاتتىقتىرۋشى، سونداي-اق عىلىمي توپ بار»، - دەپ حابارلادى بوكس فەدەراتسياسى.
قايرات ءساتجانوۆ 54 جاستا. ول بوكستان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى. 2021-2022 جىلدارى ول ۇلتتىق قۇرامانى جاتتىقتىرسا، 2024 جىلدان باستاپ جاستار قۇراماسىنىڭ اعا جاتتىقتىرۋشىسى بولدى.
«جەكە باپكەر رەتىندە قايرات ءساتجانوۆ بوكستان جەتى الەم جانە 43 ازيا چەمپيونىن دايىندادى»، - دەپ اتاپ ءوتتى فەدەراتسيا.
بۇل رەتتە باس جاتتىقتىرۋشىنىڭ جەكە شاكىرتتەرىنىڭ بولۋىنا تىيىم سالىنادى دەگەن تالاپ ەنگىزىلدى.
ايتا كەتەيىك، بۇعان دەيىن وليمپياداداعى ساتسىزدىكتەن كەيىن بوكستان قازاقستان قۇراماسىنىڭ باسشىلىعىندا وزگەرىستەر بولعان ەدى.
