قازاقستاندىق بوكسشى ماحمۇد سابىرحان 54 كەلىگە دەيىنگى سالماق دارەجەسىندە بوكستان ازيا چەمپيونى اتاندى. بۇل جەڭىسى قازاقستان قورجىنىنا التىنشى جۇلدەنى سىيلادى، دەپ حابارلايدى "ادىرنا" ۇلتتىق پورتالى.
ماحمۇدتىڭ قارسىلاسى وزبەكستاندىق شاحزود مۋزاپپاروۆ بولدى. العاشقى ەكى راۋندتا قازاقستاندىق بوكسشى 4:1 ەسەبىمەن باسىم ءتۇستى. قورىتىندىسىندا تورەشىلەر شەشىمى بويىنشا جەڭىس سابىرحانعا بەرىلدى.
ايتا كەتۋ كەرەك، ماحمۇد سابىرحان وتكەن جىلى الەم چەمپيوناتىن جەڭىپ الىپ، 2022 جىلى ازيا چەمپيوناتىنىڭ كۇمىس جۇلدەگەرى اتانعان بولاتىن. بۇل جەڭىسى وعان ازيا چەمپيوناتىنىڭ العاشقى التىنىن الىپ كەلدى.
2024 جىلعى قۇرلىق بىرىنشىلىگىندە سابىرحان تايۆاندىق يان-لين لايدى ءبىرىنشى راۋندتا نوكاۋتپەن جەڭسە، 1/4 فينالدا شري-لانكالىق دجاياناتحا كۋماردى نوكاۋتقا ءتۇسىردى. فينالعا شىعۋ جولىندا تايلاندتىق ساراۆۋت سۋكحەتپەن كەزدەسىپ، ءبىراۋىزدى شەشىممەن جەڭىسكە جەتتى.
ازيا چەمپيوناتى 30 قاراشادا تايلاندتىڭ چيانگماي قالاسىندا باستالىپ، بۇگىن، 11 جەلتوقساندا اياقتالادى. ەرلەر اراسىنداعى فينالدىق كەزدەسۋلەر وتۋدە. قازاقستان قۇراماسى فينالدىق كەزدەسۋلەرگە ون ءۇش مۇمكىندىكتىڭ توعىزىنا قاتىسىپ وتىر.
