پارادزيۋدودان قازاقستان قۇراماسى ازيا چەمپيوناتىندا 14 مەدال جەڭىپ الدى، دەپ حابارلايدى “ادىرنا” ۇلتتىق پورتالى.
استانادا پارادزيۋدودان ازيا چەمپيوناتىنىڭ جەكەلەي سايىستارى ءوز مارەسىنە جەتتى. 11 ەلدىڭ 100-دەن استام سپورتشىسى J1 (كوزى مۇلدەم كورمەيتىن) جانە J2 (كوزى ناشار كورەتىن سپورتشىلار) ساناتى بويىنشا ءوزارا مىقتىنى انىقتادى.
جەكەلەي سايىس ناتيجەسىندە قازاقستان قۇراماسى جالپى كوماندالىق مەدال كەستەسىندە ەكىنشى ورىنعا جايعاستى، دەپ حابارلايدى قازاقستان پارادزيۋدو فەدەراتسياسىنىڭ ءباسپاسوز قىزمەتى.
ازيا چەمپيوناتىنىڭ جەكەلەي جارىستارى بويىنشا مەدال كەتەسىندەگى ۇزدىك ۇشتىك كەلەسىدەي:
وزبەكستان – 4 التىن، 6 كۇمىس، 3 قولا;
قازاقستان – 4 التىن، 4 كۇمىس، 6 قولا;
يران - 3 التىن، 2 قولا.
اتاپ ايتقاندا، دايانا فەدوسوۆا (-57كگ، J2), ەرعالي شامەي (-73كگ، J1), الفيا تىلەكقابىل (-57كگ، J1) جانە جانبوتا امانجول (-90 كگ، J2) چەمپيون اتانسا، اقمارال ناۋاتبەك (-52 كگ، J2), ەرلان كونكيەۆ (+90 كگ، J2), باۋىرجان ارىستانبەكوۆ (-90 كگ، J1) جانە عالىمجان سماعۇلۇلى (-90 كگ، J2) كۇمىس، ولجاس ورازالى (-73 كگ، J2), دينارا كۋدجۋلوۆا (-70 كگ، J1), زاۋرە ايتەك (+70 كگ، J1), تالعات اجعاليەۆ (+90 كگ، J2), ەرلان وتەپوۆ (+90 كگ، J1), ديلوروم ديحانوۆا (-57 كگ، J1) قولا مەدال ەنشىلەدى.
"جەكەلەي سايىس بويىنشا قۇراما جوسپاردى تولىق ورىندادى. ازيا چەمپيوناتىندا جەڭىمپاز جانە جۇلدەگەر اتانعان سپورتشىلاردىڭ باسىم بولىگى قۇراماعا بيىل قوسىلعان جاس بالۋاندار. وسىنداي الەمدىك دارەجەدەگى العاشقى جارىستارىنا قاتىستى. ولاردىڭ كەيبىرەۋلەرى، مىسالى الفيا ساۋساعىنىڭ سىنعانىنا قاراماستان كۇرەسىپ، جانكەشتىلىك تانىتتى. 16 جاسىندا ازيا چەمپيونى اتاندى", - دەيدى قازاقستان قۇراماسىنىڭ باس باپكەرى جاندوس قيانوۆ.
بۇگىن، 30 ءساۋىر استاناداعى جاقسىلىق ۇشكەمپىروۆ اتىنداعى جەكپە-جەك سارايىندا ازيا چەمپيوناتىنىڭ كوماندالىق جارىسى وتەدى. كوماندالىق جارىسقا ەرلەر اراسىندا التى، ال ايەلدەر اراسىندا ءۇش قۇراما قاتىسادى.
