قازاقستان شاعىن ءمودۋلدى رەاكتورلار مەن زاماناۋي يادرولىق تەحنولوگيالار سالاسىندا وڭتۇستىك كورەيامەن ىنتىماقتاستىقتى دامىتۋعا مۇددەلى. بۇل تۋرالى اتوم ەنەرگەتيكاسى اگەنتتىگى توراعاسىنىڭ ورىنباسارى ۆاسيلي لاۆرەنوۆ ايتتى، دەپ حابارلايدى «ادىرنا» ءتىلشىسى.
ونىڭ ايتۋىنشا، ەنەرگەتيكالىق باعىت — ەكىجاقتى ىنتىماقتاستىقتىڭ نەگىزگى باسىم سالالارىنىڭ ءبىرى. قازاقستان اتوم ەنەرگەتيكاسى سالاسىنداعى حالىقارالىق تاجىريبەنى مۇقيات زەردەلەپ، كورەيالىق سەرىكتەستەرمەن ءبىلىم الماسۋعا قىزىعۋشىلىق تانىتىپ وتىر.
«ىنتىماقتاستىقتىڭ پەرسپەكتيۆالى باعىتى — شاعىن ءمودۋلدى رەاكتورلارعا قاتىستى جوبالاردى دامىتۋ. قازاقستان بۇل سالاداعى حالىقارالىق تاجىريبەنى مۇقيات زەرتتەپ، زاماناۋي رەاكتورلىق تەحنولوگيالار بويىنشا تاجىريبە جانە ساراپتامالىق ءبىلىم الماسۋعا مۇددەلى»، – دەدى لاۆرەنوۆ.
ول سونداي-اق كورەيالىق KHNP كومپانياسىنىڭ تەحنولوگيالىق شەشىمدەرى مەن حالىقارالىق تاجىريبەسى كوپفاكتورلى تالداۋ ناتيجەسىندە جوعارى باعالانعانىن اتاپ ءوتتى. بۇل تالداۋ تەحنولوگيالىق، قارجىلىق جانە ينفراقۇرىلىمدىق پارامەترلەردى قامتىعان.
لاۆرەنوۆتىڭ ايتۋىنشا، قازىرگى ۋاقىتتا تاراپتار اتوم ەنەرگەتيكاسى سالاسىنداعى جاڭا بىرلەسكەن باستامالاردى ىسكە اسىرۋعا قوسىمشا قۇرال بولاتىن ءوزارا تۇسىنىستىك تۋرالى مەموراندۋم جوباسىن ازىرلەۋدە.
