الماتىدا قازا تاپقان 19 جاستاعى اياجان ەدىلوۆانىڭ تۋىستارى بويجەتكەننىڭ ولىمىنە قاتىستى مالىمدەمە جاسادى، دەپ حابارلايدى «ادىرنا» ءتىلشىسى. بۇل تۋرالى «نەمولچيKZ» قوعامدىق قورى جازدى.
مارقۇم "سىمبات" ديزاين جانە ءسان اكادەمياسىندا وقىعان. ونىڭ اۆتورلىق توپتامالارى مەن ينتەرنەت-دۇكەنى دە بولعان. ستۋدەنت ءوز بۇيىمدارىن ساتىپ، قوسىمشا سۇلۋلىق سالونىندا جۇمىس ىستەگەن.
«سول كۇنى اياجان جۇمىستان شىعىپ، جاتاقحاناعا ورالمادى. ول ەر اداممەن تانىسۋ ءۇشىن كەزدەسۋگە بارعان جوق، سەبەبى سۇيگەن جىگىتى بار ەدى. بويجەتكەن ينتەرنەت-دۇكەنىنىڭ جۇمىسى بويىنشا بەيتانىس اداممەن كەزدەسكەن بولۋى مۇمكىن»،-دەدى تۋىستارى.
قور وكىلدەرىنىڭ ايتۋىنشا، اياجان 19 ناۋرىز كۇنى كەشكە جۇمىستان ساعات 20.48-دە شىققان. ارۋدى جىگىت جاتاقحانانىڭ جانىندا كۇتىپ تۇرىپ، قوڭىراۋ شالعان. وسىدان كەيىن قىزبەن بايلانىس جوعالعان.
20 ناۋرىز كۇنى تاڭەرتەڭ ىزدەۋ باستالدى. تۋىستارى پوليتسياعا ساعات 12:00-دە حابارلاسقان. الايدا ولار شاعىمدى بىردەن قابىلداماعان. اياجاننىڭ دوستارى مەن ەرىكتىلەر قوسىلىپ، تاكسي قىزمەتىنەن سۇراستىرا باستايدى.
21 ناۋرىزدا ەرىكتىلەر تاكسي جۇرگىزۋشىسىن Indriver قوسىمشاسى ارقىلى تابادى. ول اياجاندى قايدا اپارعانىن ايتىپ، تاپسىرىستى رۋسلان ەسىمدى ازاماتتىڭ بەرگەنىن مالىمدەيدى. بۇل مەكەنجاي پوليتسياعا حابارلانىپ، سودان كەيىن ولار ابونەنتتىك ءنومىردىڭ بازالىق ستانتسياسى ارقىلى قىزدى ىزدەۋگە كوشەدى.
تۇنگى ساعات 23:00 شاماسىندا قىزمەتكەرلەر اتالعان مەكەنجايعا جەتەدى. الايدا پوليتسەيلەر اياجاننىڭ تۋىستارىن ىشكە كىرگىزبەگەن.
«پاتەرگە ەكى جەدەل جاردەم كولىگى كەلىپ، جارالانعان ەر ادامدى الىپ شىقتى. كوميسسار بىزگە بويجەتكەننىڭ جوق ەكەنىن ايتىپ، تاڭەرتەڭ كەلۋىمىزدى ءوتىندى»،-دەيدى تۋىستارى.
مارقۇمنىڭ اعاسى قارىنداسىنىڭ ءولىمى تۋرالى سۋىق حاباردى Instagram جەلىسىنەن بىلگەنىن ايتتى. پوليتسيا بۇل تۋرالى قالاي حابارلاۋدى بىلمەگەندەرىن العا تارتقان.
«اياجان قاتىگەزدىكپەن ءولتىرىلدى. ول بولشەكتەلگەن كۇيىندە تابىلعان. مارقۇمنىڭ تۋىستارى ول جالعىز قۇربان بولماۋى مۇمكىن ەكەنىن ايتادى»،- دەدى قور باسشىسى دينا ءتاڭسارى.
ايتا كەتەيىك، 19 جاسار قىزدى ءولتىردى دەگەن كۇدىكپەن 1993 جىلعى تۇركىستان وبلىسىنىڭ تۇرعىنى ۇستالدى.
«ادىرنا» ۇلتتىق پورتالى
