قىتاي حالىق رەسپۋبليكاسىنىڭ مەملەكەتتىك كەڭەس مۇشەسى، قوعامدىق قاۋىپسىزدىك ءمينيسترى چجاو كەچجي شىڭجاڭعا جۇمىس ساپارىمەن باردى. ول شىڭجاڭ ايماعىندا 19-24 ناۋرىز ارالىعىندا بولىپ، وزگەرىستەرگە باعا بەردى. بۇل تۋرالى 24 ناۋرىزدا سينحۋا اگەنتتىگى حابارلادى.
ساپار بارىسىندا چجاو كەچجي "تەرروريزممەن كۇرەس جانە قوعامدىق تىنىشتىقتى ساقتاۋدا قىراعىلىقتى ارتتىرۋ كەرەكتىگىن" ايتقان. ونىڭ پايىمىنشا شىڭجاڭ تەرروريزممەن كۇرەسۋ ارقىلى ەكونوميكالىق جەتىستىكتەرگە جەتكەن. ول تەرروريزم تاراپىنان تۋى مۇمكىن قاۋىپتەردى ەسكەرە وتىرىپ، ايماقتىڭ تىنىشتىعىن قامتاماسىز ەتۋ ءۇشىن تەرروريزمگە جاسالاتىن قىسىمدى ارتتىرا بەرۋ كەرەكتىگىن ايتقان. حالىقارالىق تەرروريزممەن كۇرەس بولىمشەلەرىمەن دە ارىپتەستىكتى كۇشەيتۋ قاجەتتىگىن تىلگە تيەك ەتكەن.
شىڭجاڭ ايماعىندا 2016 جىلدان باستاپ "تەرروريزممەن كۇرەس" دەگەن جەلەۋمەن وزگە ۇلت وكىلدەرىنە قىسىم جاسالىپ، ادام قۇقىعى تاپتالۋدا. بۇعان قاتىستى باتىس بەيجىڭگە ايىپتاۋلار تاعىپ، سوڭعى اپتادا سانكتسيالار سالدى.
اسحات قاسەنعالي
"ادىرنا" اقپاراتتىق پورتالى
