Qytaı Halyq Respýblıkasynyń Memlekettik keńes múshesi, qoǵamdyq qaýipsizdik mınıstri Chjao Kechjı Shyńjańǵa jumys saparymen bardy. Ol Shyńjań aımaǵynda 19-24 naýryz aralyǵynda bolyp, ózgeristerge baǵa berdi. Bul týraly 24 naýryzda Sınhýa agenttigi habarlady.
Sapar barysynda Chjao Kechjı "terrorızmmen kúres jáne qoǵamdyq tynyshtyqty saqtaýda qyraǵylyqty arttyrý kerektigin" aıtqan. Onyń paıymynsha Shyńjań terrorızmmen kúresý arqyly ekonomıkalyq jetistikterge jetken. Ol terrorızm tarapynan týýy múmkin qaýipterdi eskere otyryp, aımaqtyń tynyshtyǵyn qamtamasyz etý úshin terrorızmge jasalatyn qysymdy arttyra berý kerektigin aıtqan. Halyqaralyq terrorızmmen kúres bólimshelerimen de áriptestikti kúsheıtý qajettigin tilge tıek etken.
Shyńjań aımaǵynda 2016 jyldan bastap "terrorızmmen kúres" degen jeleýmen ózge ult ókilderine qysym jasalyp, adam quqyǵy taptalýda. Buǵan qatysty Batys Beıjińge aıyptaýlar taǵyp, sońǵy aptada sankııalar saldy.
Ashat QASENǴALI
"Adyrna" aqparattyq portaly
