شىمكەنت قالاسىندا ءوتىپ جاتقان «انگيونەۆرولوگيا: يننوۆاتسيا مەن پەرسپەكتيۆالارى» اتتى حالىقارالىق كونفەرەنتسياعا ەلىمىزدىڭ وزگە وڭىرلەرى مەن تاتارستان، ماسكەۋ قالاسىنىڭ دارىگەرلەر ونلاين قاتىستى. نەۆروپاتولوگ، نەيروحيرۋرگ، تەراپەۆت سەكىلدى ماماندار باس ميى اۋرۋلارىنىڭ ەپيدەميولوگياسى مەن جەدەل مي-تامىرلارى جانە تسەرەبرالدى ءينسۋلتتى ەمدەۋ جولدارىن تالقىلاۋدا.
عىلىمي كونفەرەنتسيا قالالىق دەنساۋلىق ساقتاۋ باسقارماسى مەن وڭتۇستىك قازاقستان مەديتسينا اكادەمياسىنىڭ قولداۋىمەن ۇيىمداستىرىلىپ وتىر.
باسقوسۋدا مامانداردىڭ دەرەگىنشە قازىرگى تاڭدا كەڭ تاراعان، ءارى قاۋىپتى دەرتتىڭ ءبىرى – ينسۋلت. جىل سايىن دۇنيەجۇزىندە بۇل دەرتكە شامامەن 15 ميلليون ادام ۇشىرايدى. سالدارىنان 3-5 ميلليونى قايتىس بولادى.
–ەلىمىزدە جىلىنا 40 مىڭعا جۋىق ادام ينسۋلتقا شالدىعادى. اۋىرعانداردىڭ سەكسەن پايىزى مۇگەدەك بولىپ قالادى. سول مۇگەدەكتىك بولعان ازاماتتاردى وڭالتۋ ەمى ارقىلى ەمدەپ كەلەمىز. ينسۋلت العانداردىڭ دەنى الپىستان اسقان ازاماتتار. اۋرۋدىڭ الدىن الۋ ماقساتىندا رەسپۋبليكا بويىنشا ينسۋلت قىزمەتىن دامىتۋ تۇجىرىمداماسىن ازىرلەدىك. ەلىمىزدىڭ بارلىق وڭىرلەرىندە ينسۋلت ورتالىعى جۇمىس ىستەپ وتىر. تاعى دا ايتارىم، ءينسۋلتتى ەمدەۋدەن، الدىن-الۋ الدەقايدا ءتيىمدى. بۇل ءۇشىن ازاماتتار وزدەرى تىركەلگەن جەرگىلىكتى ەمحاناعا بارىپ، سكرينينگ تەكسەرۋدەن ءوتۋ قاجەت. حولەستەرين جانە قان قىسىمىن تۇراقتى تۇردە تەكسەرتىپ، سالاۋاتتى ءومىر سالتىن ۇستانعان ابزال،-دەيدى ۇلتتىق نەيروحيرۋرگيا ورتالىعىنىڭ ديرەكتورى ادىلبەكوۆ ەرجان.
ايتا كەتەيىك، حالىقارالىق كونفەرەنتسيا ەكى كۇنگە سوزىلادى. شاراعا قاتاسىقان مەديتسينا ماماندارىنا ارنايى سەرتيفيكات تابىستالماق.
شىمكەنت قالاسى اكىمدىگىنىڭ ءباسپاسوز قىزمەتى
