قازىرگى تاڭدا، بۇل ۆاكتسينا قان ورتالىعىنداعى مۇزداتقىش كامەرالارىندا ۋاقىتشا ساقتالىپ، ەرتەڭنەن باستاپ ەمحانالارعا تاراتىلادى. ۆاكتسينالاۋعا مەديتسينالىق-سانيتارلىق كومەك مەكەمەلەرىندە 21 ەگۋ كابينەتى دايىندالعان.
بۇل جونىندە ءباسپاسوز بريفينگتە قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ باياندادى.
باسقارما باسشىسىنىڭ مالىمدەۋىنشە، جەتكىزىلگەن ۆاكتسينا مەديتسينا قىزمەتكەرلەرى مەن مۇعالىمدەرگە جانە پوليتسيا قىزمەتكەرلەرىنە سالىنادى.
بۇگىنگە دەيىن شاھاردا 5827 ازاماتقا كوۆيدكە قارسى ۆاكتسينا سالىنعان. ونىڭ 3505-ءى مەديتسينا قىزمەتكەرى، 1469-ى مۇعالىم، 128-ءى پوليتسەيلەر، ال قالعاندارى ءار ءتۇرلى ساناتتاعى ازاماتتار. ۆاكتسينا قابىلداعان ازاماتتاردىڭ بارلىعىندا جاناما اسەرى بايقالماعان.
ايتسە دە، قالانىڭ باس دارىگەرى ساقتىق شارالارىن قاتاڭ ۇستانۋ كەرەكتىگىن ەسكەرتەدى.
-وتكەن تاۋلىكتە 28 ادام كۆي ينفەكتسياسىن جۇقتىرسا، جىل باسىنان بۇل دەرتتەن 15 ادام كوز جۇمدى. قايتىس بولعانداردىڭ بارلىعى دا 60 جاستان اسقان سوزىلمالى سىرقاتتارى بار ناۋقاستار بولىپ وتىر. ەگەر ءبىز سانيتارلىق تالاپتاردى ساقتاماساق، جاسىل ايماقتان سارىعا، ونان قىزىلعا ءوتۋىمىز مۇمكىن. اۋا رايىنىڭ قۇبىلمالى بولۋىنا قاراي، بالالار اراسىندا سۋىقتاپ اۋىرعاندار كوبەيۋدە. وسى ورايدا اتا-انالارعا تاعايىندالماعان دارىلىك زاتتاردى ءوز بەتىنشە قولدانۋعا بولمايتىنىن ايتقىم كەلەدى،-دەدى ب.پوزيلوۆ.
ايتا كەتەيىك، 2020 جىلدىڭ 24 ناۋرىزىنان 17 ناۋرىز دەيىنگى ارالىقتا COVID-19 اۋرۋىنىڭ 6 417 جاعدايى تىركەلدى. (3 282 سيمپتومدى، 3 135 سيمپتومسىز). 5643 ادام ەمدەلىپ شىقسا، 94 ادام كوز جۇمعان. قازىرگى تاڭدا كۆي-مەن 69, جرۆي-مەن 140, پنەۆمونيامەن 15 ناۋقاس ەم قابىلداپ جاتىر.
ال، 1 تامىزدان 17 ناۋرىزعا دەيىن COVID-19 بەلگىلەرىمەن (ICD-10 كودى - U07.2) پنەۆمونيانىڭ 1473 جاعدايى تىركەلگەن. بۇگىنگى كۇنى قالادا 1 060 توسەك - ورىن بار (جۇقپالى - 560, كارانتين - 500), ونىڭ 834 توسەك – ورنى بوس.
شىمكەنت قالاسى اكىمدىگىنىڭ ءباسپاسوز قىزمەتى
