دەنەسى كۇيگەن ناۋقاستاردى ەمدەۋ ۋاقىتى 1,5 ەسەگە قىسقارادى. ۇلتتىق بيوتەحنولوگيا ورتالىعىنىڭ عالىمدارى سيىردىڭ قارنىنان كوللاگەندى تاڭعىش جاساۋ ءتاسىلىن ويلاپ تاپتى، دەپ حابارلايدى «حابار 24».
قازىر ماماندار ەلىمىزدىڭ بىرقاتار مەديتسينالىق ورتالىعىندا ءونىمدى كلينيكالىق زەرتتەۋدەن وتكىزىپ جاتىر. وعان اۋىر جاراقات العان 200 ادام قاتىسۋدا. سىناق بىتكەننەن كەيىن تاڭعىشتار ەل اۋرۋحانالارىنا جەتكىزىلەدى. ارنا ءتىلشىسى داريعا تاشەنوۆا عىلىمي زەرتحاناعا بارىپ، ءوندىرىس پروتسەسىمەن تانىستى.
داريعا تاشەنوۆا، ءتىلشى:
- كۇيىكتى تەز ەمدەيتىن ءونىمنىڭ قاجەتتىلىگى تۋرالى ەلوردالىق دارىگەرلەر بۇرىننان ويلاپ جۇرگەن. 2012 جىلى ولار بيوتەحنولوگيا ورتالىعىنا كەلىپ، ءوز يدەيالارىمەن ءبولىستى. كۇيىك جاراقاتى ۇزاق ۋاقىت جازىلمايدى. عالىمدار 3 جىل قاتارىنان زەرتتەۋ جۇمىستارىن جۇرگىزىپ، سيىردىڭ قارنىنداعى پايداعا اسپايتىن ىشەكتەردىڭ ەمدىك قاسيەتى بار ەكەنىن انىقتادى. ونى 1 اپتا بويى تازالاپ، زارارسىزداندىرعاننان كەيىن ادام دەنەسىنە قولدانۋعا بولادى.
ەرلان رامانقۇلوۆ، قر بعم عك ۇلتتىق بيوتەحنولوگيا ورتالىعىنىڭ باس ديرەكتورى:
- ادامنىڭ تەرىسى قاتتى زاقىمدانسا، سول ورىندى مىنا تاڭعىشپەن بايلاپ، ەمدەۋگە بولادى. ءبىز ونى ءتۇرلى پەپتيد جانە انتيبيوتيكتەرمەن قانىقتىرامىز. بۇل ماتەريال ۋاقىتشا ادام تەرىسىنىڭ ورنىن باسادى. ول قۇرعاپ كەتپەيدى، جاراقاتتاعى سۋدى ءسىڭىرىپ الادى. ينفەكتسيالاردىڭ پايدا بولۋىنا جول بەرمەيدى. قازىر ءبىز تاجىريبە رەتىندە بۇل ءونىمدى كۇيىك ورتالىقتارىندا قولدانىپ جاتىرمىز. زەرتتەۋ ناتيجەلەرى وتە جاقسى. ناۋقاستاردىڭ جاراقاتتارى تەز جازىلىپ كەتەدى. سىناق اياقتالعاننان كەيىن تىركەۋدەن ءوتىپ، بۇل ءونىمدى وتاندىق اۋرۋحانالارعا جەتكىزەمىز.
وتاندىق ءونىمنىڭ باعاسى دا قولجەتىمدى. قازىر عالىمدار ءبىر مەمبرانانىڭ قۇنىن 4 مىڭ تەڭگەگە باعالاپ وتىر. الايدا ءوندىرىس تولىققاندى ىسكە قوسىلعاننان كەيىن باعاسى ارزاندايدى. ماماندار ونىڭ ساپاسىنا دا باسا نازار اۋدارادى.
ۆياچەسلاۆ وگاي، قر بعم عك ۇلتتىق بيوتەحنولوگيا ورتالىعىنىڭ دىڭگەكتى جاسۋشالار زەرتحاناسىنىڭ مەڭگەرۋشىسى:
- بۇل تاڭعىش II جانە III دەڭگەيلى كۇيىكتى ەمدەۋگە جارامدى. ءبىز بيوماتەريالدى ساتىپ العاننان كەيىن ونى بىرنەشە كەزەڭمەن تازارتامىز. ىشىندەگى اشىتقىلاردى جويامىز. رادياتسيا ارقىلى زارارسىزداندىرامىز. ونى 2 رەت قاپتايمىز. سودان كەيىن ساپاسىن تاعى ءبىر رەت تەكسەرەمىز. ەگەر بۇنى جاساماساق، سيىردىڭ ىشەگىندەگى باكتەريالار قالىپ قالادى. سالدارىنان ونى پايدالانعان ناۋقاستىڭ تەرىسىندە اللەرگيا شىعۋى مۇمكىن.بۇل تاڭعىشتىڭ جارامدىلىعى – 2 جىل. ونى 4 گرادۋسقا قويىلعان توڭازىتقىشتا ساقتاۋ كەرەك.
ءونىمدى كلينيكالىق زەرتتەۋ جۇمىستارى جاقىندا اياقتالادى. كۇزدە عالىمدار ونى دەنساۋلىق ساقتاۋ مينيسترلىگىنىڭ رەەسترىندە تىركەيدى. بولجام بويىنشا 2022 جىلى بۇل تاڭعىشتاردى وتاندىق اۋرۋحانالاردا جاپپاي قولدانۋعا بولادى. كەيىن ماركەتولوگتاردىڭ كومەگىمەن كورشى ەلدەرگە ەكسپورتتاۋ جوسپارلانىپ وتىر.
