ناۋرىز - جاڭارۋ مەن جاڭعىرۋدىڭ مەيرامى بولسا، مەرەكە قارساڭىندا جاڭعىرعان كىتاپحانالاردىڭ لەگىن ۇسىنامىز. شىمكەنت قالاسىنىڭ اكىمى مۇرات ايتەنوۆ ءوزىنىڭ حالىققا ەسەبىندە كىتاپحانالاردى كونتسەپتۋالدىق وزگەرىس كۇتىپ تۇرعانىن ايتقان بولاتىن.
مەرەكە قارساڭىندا بادام وزەنىنىڭ ارعى جاعىنداعى (حالىق “زابادام” دەپ اتاپ كەتكەن) تۇرعىن الاپتا ورنالاسقان شاعىن كىتاپحانا جاڭعىرتىلدى.
سونىمەن بىرگە، بالالار كىتاپحاناسىنا دا جاڭعىرۋ جۇمىستارى ءجۇرىپ جاتىر. قالا اكىمى كەشە بارىپ تانىستى. بۇل كىتاپحانانىڭ “فيشكاسى” ءۇي قابىرعاسىنا سالىنعان كىتاپ-مۋرالدار كىشكەنتاي وقىرماندارىن الىستان مەنمۇندالاپ شاقىرىپ تۇرادى. بۇل - قازاقستانداعى قابىرعاعا سالىنعان ەڭ ۇلكەن كىتاپ-مۋرالدار.
قىزعالداق-قالامىزدا 5 كىتاپحانا مەن ولاردىڭ 35 فيليالى بار. بيىل سولاردىڭ ونشاقتىسىن جاڭعىرتۋ جوسپاردا بار.
الەۋمەتتانۋشى رەي ولدەنبۋرگتىڭ ء“ۇشىنشى ورىندار” اتتى تەورياسىن بىلەسىز بە؟بۇل تەورياعا سايكەس، ادام ومىرىندە ماڭىزدى ەكى باستى ورىن بار: ءۇي مەن جۇمىس ورنى. رەيدىڭ پايىمىنشا، ادامدارعا ءۇي مەن جۇمىستان تىس، مازمۇندى ۋاقىت وتكىزەتىن ءۇشىنشى ورىن كەرەك.
ءۇشىنشى ورىن قانداي بولۋى مۇمكىن؟ قازىر مەيرامحانا، بار، سىراحانا، باسقا نە بار ەدى، وسىلار ءۇشىنشى ورىندارعا اينالدى.
ءبىزدىڭ ماقساتىمىز كىتاپحانالاردى ءۇشىنشى ورىندارعا اينالدىرۋ. جۇمىس ىستەۋ ۋاقىتى ۇزارتىلىپ جاتىر. مەملەكەتتەن قارجى بولىنبەيتىن كافە-مافەلەردىڭ ەسىگى ءتۇن اۋعانشا جانە دەمالىس كۇندەرى اشىق تۇرادى، ال مەملەكەت قارجىلاندىرىپ وتىرعان كىتاپحانالار نەگە كەشكى ساعات التىعا دەيىن جۇمىس ىستەپ، سەنبى-جەكسەنبىدە دەمالۋعا ءتيىس.
ەگەر مازمۇندى ۋاقىت وتكىزەتىن كىتاپحانالاردى ءۇشىنشى ورىندارعا اينالدىرامىز دەسەك، ولار ۇسىناتىن قۇندىلىق قازىر جاستار تولىپ وتىراتىن كافەينيالاردان كوبىرەك بولۋعا ءتيىس.
سونىمەن بىرگە، قالا اكىمىنىڭ باستاماسىمەن قىزعالداق-قالادا بيىلدان باستاپ ءجۇز شاقتى سپورت الاڭدارى سالىنعالى جاتىر.
مىنە، سپورت كەشەندەرى، كونتسەرت زالدارى، كىتاپحانالاردى ءۇشىنشى ورىندارعا اينالدىرا الساق قانا ۇلت ساناسى جاڭعىرادى، رۋحاني جاڭعىرامىز. ول ءۇشىن، ارينە، مادەنيەت ورىندارىنىڭ ءمانى دە، ءسانى دە جاڭعىرۋى ءتيىس.
قۇدايعا شۇكىر، قىزعالداق-قالادا مادەنيەت سالاسىنىڭ ينفراقۇرىلىمى قالىپتاسقان. اعا-اپا بۋىنعا مىڭ العىس!
قانشاما تەاتر، مادەنيەت ۇيلەرى مەن كىتاپحانالار بار. ەندى بارىمىزدى باعالاپ، باعاسىن ارتتىرا ءتۇسۋ ءبىزدىڭ بۋىننىڭ مىندەتى.
ناۋرىز - جاڭارۋ مەن جاڭعىرۋدىڭ مەيرامى. مەرەكە قۇتتى بولسىن!
شىڭعىس مۇقان،
شىمكەنت قالاسى اكىمىنىڭ ءبىرىنشى ورىنباسارى
