شىمكەنتتىڭ دەندرولوگيا ساياباعىندا بىرەۋىنىڭ قۇنى 9 ميلليون تەڭگەگە باعالانعان دارەتحانالاردى اكىمدىككە قاراستى الەۋمەتتىك-كاسىپكەرلىك كورپوراتسياسى ورناتقان، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەپ.
تەلەارنانىڭ حابارلاۋىنشا، از قامتىلعان وتباسىلاردى قولداۋعا دەپ جينالعان دەمەۋشىلەردىڭ اقشاسىنا الەۋمەتتىك-كاسىپكەرلىك كورپوراتسياسى دەندروساياباقتا تۇرعان دارەتحانالاردى ءسۇرىپ تاستاپ، ورنىنا 5 اجەتحانا قويعان. ونىڭ ارقايسىسى قاڭىلتىرمەن قاپتالعان. ەرلەر مەن ايەلدەر جاعىندا ءبىر-ءبىر بولىگى ىستەسە، مۇگەدەكتەرگە ارنالعان ەسىكتەرى جابىق. ىستىق سۋ اقپايدى. توققا قوساتىن سىمدارىنىڭ كەي جەرى كۇيىپ كەتكەن.
الەۋمەتتىك كاسىپكەرلىك كورپوراتسياسى اتالعان دارەتحانالارعا قاتىستى ءمان-جايدى ءتۇسىندىرۋدى ءجون دەپ تاپپاعان. ارنايى حات تالاپ ەتكەن.
الايدا تەلەارناعا مودۋلدىك اجەتحاناعا قاتىستى سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى پىكىر بىلدىرگەن.
"45 ميلليوندىق قارجىعا دەندرولوگيا ساياباعىنا بەس مودۋلدىك اجەتحانا ورنالاستىرىلادى. ول ارقايسىسى 9 ميلليون تەڭگەدەن، ءبىر بولمەلى پاتەردىڭ قۇنىمەن بىردەي. بۇل بيۋدجەتتىك قارجى ەمەس. بىراق سوندا دا ول كاسىپكەرلەردىڭ، مەتسەناتتاردىڭ قارجىسى بولعاندىقتان، بۇنى ماقساتتى، ءتيىمدى تۇردە پايدالانۋ قاجەت", - دەيدى سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتىنىڭ باس مامانى جاني قامبار.
“ادىرنا” ۇلتتىق پورتالى
