نۇرلان ءالىمجانوۆتىڭ بۇگىننەن باستاپ نۇر-سۇلتان قالاسى مادەنيەت باسقارماسىنىڭ باسشىسى لاۋازىمىنا تاعايىندالعانى بەلگىلى بولدى، دەپ حابارلايدى "ادىرنا" ۇلتتىق پورتالى Nege.kz سايتىنا سىلتەمە جاساپ.
Nege.kz پورتالىندا «نۇرلان ءالىمجانوۆ نۇر-سۇلتان اكىمدىگىنەن جۇمىس سۇراپ ءجۇر» دەگەن ماقالا جاريالانىپ، وعان ەكس-دەپۋتات شامدانىپ قالعان. ماقالا جاريالانعاننان كەيىن رەداكتسياعا ءوزىن «ءالىمجانوۆتىڭ تىكەلەي مەنەدجەرىمىن» دەپ تانىستىرعان دينارا ورازباەۆادان اشۋلى حات كەلدى.
مەنەدجەرىنىڭ ايتۋىنشا، نۇرلان ءالىمجانوۆ نۇر-سۇلتان قالالىق اكىمدىگىنە جۇمىس سۇراپ بارعان جوق، اكىمدىك ونى وزدەرى شاقىرعان. ءتىلشىمىز وقيعانىڭ ءمان-جايىن انىقتاۋ ماقساتىندا نۇر-سۇلتان قالاسىنىڭ اكىمدىگىنە رەسمي ساۋال جولداعان بولاتىن. حاتىمىزعا جاۋاپ كوپ ۇزاماي قولىمىزعا ءتيدى.
نۇر-سۇلتان قالاسى اكىمىنىڭ اپپاراتىنىڭ حابارلاۋىنشا، اكىمدىك نۇرلان ءالىمجانوۆتى شاقىرماعان. سونىمەن قاتار، اكتەرمەن جەكە كەزدەسۋ دە ۇيىمداستىرىلماعان بولىپ شىقتى.
ەسەسىنە، نۇرلان ءالىمجانوۆتىڭ بۇگىننەن باستاپ نۇر-سۇلتان قالاسى مادەنيەت باسقارماسىنىڭ باسشىسى لاۋازىمىنا تاعايىندالعانى بەلگىلى بولدى.
«ن. ءالىمجانوۆ «قازاقستان رەسپۋبليكاسىنىڭ مەملەكەتتىك قىزمەتى تۋرالى» قر زاڭىنىڭ 16-بابىنا سايكەس جانە قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ «ب» كورپۋسىنىڭ مەملەكەتتىك اكىمشىلىك لاۋازىمىنا ورنالاسۋعا ارنالعان كونكۋرستى وتكىزۋ قاعيدالارى نەگىزىندە وتكىزىلگەن كونكۋرس ناتيجەسىندە «نۇر-سۇلتان قالاسىنىڭ مادەنيەت باسقارماسى» مم باسشىسى لاۋازىمىنا اعىمداعى جىلى 19 ناۋرىزدا ارنايى تەكسەرۋدىڭ ناتيجەلەرىن العان كۇنگە دەيىن جۇمىسقا قابىلداندى»، – دەلىنگەن رەسمي جاۋاپتا.
ايتا كەتەيىك، نۇر-سۇلتان قالاسى مادەنيەت باسقارماسىنىڭ بۇرىنعى باسشىسى نۇرلان سىدىقوۆ پارا الدى دەگەن كۇدىكپەن ۇستالعان بولاتىن. سوت سىدىقوۆتى كىنالى دەپ تاۋىپ، 5 جىلعا باس بوستاندىعىنان ايىرعان.
ن.سىدىقوۆ
ەندى مىنە، كونكۋرستىق ىرىكتەۋلەر ناتيجەسىندە مادەنيەت باسقارماسىنان ءىستى بولىپ كەتكەن نۇرلاننىڭ ورنىنا تاعى ءبىر نۇرلان باستىق بولىپ كەلدى. ەكس-دەپۋتاتتىڭ وكپەسى ەندى باسىلاتىن شىعار...
