Nurlan Álimjanovtyń búginnen bastap Nur-Sultan qalasy Mádenıet basqarmasynyń basshysy laýazymyna taǵaıyndalǵany belgili boldy, dep habarlaıdy "Adyrna" ulttyq portaly Nege.kz saıtyna silteme jasap.
Nege.kz portalynda «Nurlan Álimjanov Nur-Sultan ákimdiginen jumys surap júr» degen maqala jarııalanyp, oǵan eks-depýtat shamdanyp qalǵan. Maqala jarııalanǵannan keıin redakııaǵa ózin «Álimjanovtyń tikeleı menedjerimin» dep tanystyrǵan Dınara Orazbaevadan ashýly hat keldi.
Menedjeriniń aıtýynsha, Nurlan Álimjanov Nur-Sultan qalalyq ákimdigine jumys surap barǵan joq, ákimdik ony ózderi shaqyrǵan. Tilshimiz oqıǵanyń mán-jaıyn anyqtaý maqsatynda Nur-Sultan qalasynyń ákimdigine resmı saýal joldaǵan bolatyn. Hatymyzǵa jaýap kóp uzamaı qolymyzǵa tıdi.
Nur-Sultan qalasy ákiminiń apparatynyń habarlaýynsha, ákimdik Nurlan Álimjanovty shaqyrmaǵan. Sonymen qatar, aktermen jeke kezdesý de uıymdastyrylmaǵan bolyp shyqty.
Esesine, Nurlan Álimjanovtyń búginnen bastap Nur-Sultan qalasy Mádenıet basqarmasynyń basshysy laýazymyna taǵaıyndalǵany belgili boldy.
«N. Álimjanov «Qazaqstan Respýblıkasynyń memlekettik qyzmeti týraly» QR Zańynyń 16-babyna sáıkes jáne Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi Tóraǵasynyń «B» korpýsynyń memlekettik ákimshilik laýazymyna ornalasýǵa arnalǵan konkýrsty ótkizý qaǵıdalary negizinde ótkizilgen konkýrs nátıjesinde «Nur-Sultan qalasynyń Mádenıet basqarmasy» MM basshysy laýazymyna aǵymdaǵy jyly 19 naýryzda arnaıy tekserýdiń nátıjelerin alǵan kúnge deıin jumysqa qabyldandy», – delingen resmı jaýapta.
Aıta keteıik, Nur-Sultan qalasy Mádenıet basqarmasynyń burynǵy basshysy Nurlan Sydyqov para aldy degen kúdikpen ustalǵan bolatyn. Sot Sydyqovty kináli dep taýyp, 5 jylǵa bas bostandyǵynan aıyrǵan.
N.Sydyqov
Endi mine, konkýrstyq irikteýler nátıjesinde Mádenıet basqarmasynan isti bolyp ketken Nurlannyń ornyna taǵy bir Nurlan bastyq bolyp keldi. Eks-depýtattyń ókpesi endi basylatyn shyǵar...