تالدىقورعان قالاسى نازارباەۆ زياتكەرلىك مەكتەبىنىڭ وقۋشىلارى پلاستيك جينايتىن تەرمينال ويلاپ تاپتى، دەپ حابارلايدى «ادىرنا» ءتىلشىسى.
ءداستۇرلى X ناۋرىز كەزدەسۋلەرىندە ۆيكتور كاحنو مەن ۆالەريا كيم «سوڭىنان جاقسى ءىس قالدىر!» اتتى جوبا ۇسىنعان.
بيىل مەرەيتويلىق كەزدەسۋلەر ونلاين رەجيمدە جەردىڭ جاسىل بولاشاعىنا ارنالعان «پلانەتا جانە پلاستيك: ادامزات مادەنيەتى» تاقىرىبىندا وتۋدە.
پلاستيك قالدىقتار – قازىرگى زاماننىڭ كەلەلى ماسەلەلەرىنىڭ ءبىرى. ول قورشاعان ورتاعا وندىرىستەن باستاپ جويىلعانعا دەيىن وراسان زيان كەلتىرەدى. بۇل ماسەلەنىڭ شەشىمى پلاستيك قالدىقتاردى قايتا وڭدەۋ بولىپ تابىلادى.
زياتكەر وقۋشىلار وزدەرىنىڭ بالاماسىن ۇسىندى. ولار ادامزاتتى پلاستيك جيناۋعا شاقىرۋ ءۇشىن بوتەلكەلەردى قابىلداۋعا ارنالعان روبوتتاندىرىلعان تەرمينال ويلاپ تاپتى. ەرەكشەلىگى – تەرمينالعا سالىنعان ءار پلاستيك بوتەلكە ءۇشىن اۆتومات قامقورسىز قالعان جانۋارلارعا تاماق بەرەدى. وقۋشىلاردىڭ وسىنداي قىزىقتى شەشىمى لاقتىرىلاتىن پلاستيك قالدىقتارىن ازايتىپ قانا قويماي، جانۋارلارعا قامقورلىق جاساي الادى.
جوبا اۆتورلارىنىڭ ايتۋىنشا، تەرمينالدا جۇكتەلگەن نىساندى تاني الاتىن جانە قوقىستى باستاپقى سۇرىپتاۋدى ورىنداي الاتىن نەيروندىق جەلى ورناتىلعان كومپيۋتەر بار، ول پلاستيكتى جانە پلاستيك ەمەس قوقىستى اجىراتادى; بولاشاقتا جينالعان پلاستيك قايتا وڭدەۋگە جىبەرىلەدى.
تەرمينال تەك ازىق-تۇلىكتى عانا ەمەس، سونىمەن قاتار اۋىز سۋدى ارنايى ناۋالارعا جىبەرەدى جانە كەز كەلگەن ءۇي-كۇيسىز جانۋار ودان قورەكتەنە الادى.
«ادىرنا» ۇلتتىق پورتالى
