Taldyqorǵan qalasy Nazarbaev Zııatkerlik mektebiniń oqýshylary plastık jınaıtyn termınal oılap tapty, dep habarlaıdy «Adyrna» tilshisi.
Dástúrli X Naýryz kezdesýlerinde Vıktor Kahno men Valerııa Kım «Sońynan jaqsy is qaldyr!» atty joba usynǵan.
Bıyl mereıtoılyq kezdesýler onlaın rejımde Jerdiń jasyl bolashaǵyna arnalǵan «Planeta jáne plastık: Adamzat mádenıeti» taqyrybynda ótýde.
Plastık qaldyqtar – qazirgi zamannyń keleli máseleleriniń biri. Ol qorshaǵan ortaǵa óndiristen bastap joıylǵanǵa deıin orasan zııan keltiredi. Bul máseleniń sheshimi plastık qaldyqtardy qaıta óńdeý bolyp tabylady.
Zııatker oqýshylar ózderiniń balamasyn usyndy. Olar adamzatty plastık jınaýǵa shaqyrý úshin bótelkelerdi qabyldaýǵa arnalǵan robottandyrylǵan termınal oılap tapty. Ereksheligi – termınalǵa salynǵan ár plastık bótelke úshin avtomat qamqorsyz qalǵan janýarlarǵa tamaq beredi. Oqýshylardyń osyndaı qyzyqty sheshimi laqtyrylatyn plastık qaldyqtaryn azaıtyp qana qoımaı, janýarlarǵa qamqorlyq jasaı alady.
Joba avtorlarynyń aıtýynsha, termınalda júktelgen nysandy tanı alatyn jáne qoqysty bastapqy suryptaýdy oryndaı alatyn neırondyq jeli ornatylǵan kompıýter bar, ol plastıkti jáne plastık emes qoqysty ajyratady; bolashaqta jınalǵan plastık qaıta óńdeýge jiberiledi.
Termınal tek azyq-túlikti ǵana emes, sonymen qatar aýyz sýdy arnaıy naýalarǵa jiberedi jáne kez kelgen úı-kúısiz janýar odan qorektene alady.
«Adyrna» ulttyq portaly
