بيلەتتەر ساتىلىمدا: انشىلەرگە قاتاڭ تىيىم سالىنا ما؟

1595
Adyrna.kz Telegram

قازاقستاندا تانىمال ءانشى-ارتىستەردىڭ كونتسەرتتەرىنە بيلەت ساتۋدىڭ زاڭدىلىعى تەكسەرىلەدى. بۇل تۋرالى دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتارلىق دارىگەر ەرلان قياسوۆ مالىمدەدى، دەپ حابارلايدى “ادىرنا” ۇلتتىق پورتاوى Sputnik قازاقستان سايتىنا سىلتەمە جاساپ.

ەپيدەميولوگيالىق جاعدايعا ارنالعان ونلاين ءباسپاسوز ءماسليحاتى بارىسىندا جۋرناليستەر قازاقستاندا ءىرى كونتسەرتتەرگە بيلەت ساتۋعا نەگە رۇقسات بەرىلگەنىن سۇرادى. ارتىستەر جۇزدەگەن كورەرمەنگە ارنالعان ستاديونداردا ونەر كورسەتپەك.

"بۇعان قاتىستى جەكە تەرگەۋ جۇرگىزەمىز. بىراق، جالپى، "جاسىل" ايماقتا كونتسەرت زالدارى مەن تەاترلاردا زالدى 30 پروتسەنتكە عانا تولتىرىپ، بارلىق سانيتارلىق تالاپتى ساقتاپ، شارالار وتكىزۋگە رۇقسات ەتىلگەن. ال "سارى" ايماقتا كونتسەرت زالدارى، تەاترلار مەن كينوتەاترلاردا كورەرمەندەر سانى 20%-تەن اسپاۋعا ءتيىس. بۇل پارامەترلەر رەسپۋبليكا دەڭگەيىندە شىققان قاۋلى نەگىزىندە ەنگىزىلدى", - دەدى قياسوۆ.
ول قازىرگى تاڭدا ۇلكەن ءىس-شارالاردى وتكىزۋگە تىيىم سالىنعانىن اتاپ ءوتتى.

ء"سىز ايتقان فاكتىلەر بويىنشا تولىق اقپارات سۇراتىپ، ءار دەرەكتى جەكە-جەكە قارايمىز. قانشالىقتى زاڭبۇزۋشىلىق بولعانىن انىقتايمىز. بالكىم، بيلەت ساتۋ كەلىسىلمەگەن شىعار. بيلەتتەر الماتى مەن نۇر-سۇلتان قالالارى "جاسىل" ايماقتا تۇرعان كەزەڭدە ساتىلعان بولۋى مۇمكىن. ءدال قازىرگى تاڭدا بۇل شارالاردى وتكىزۋگە تىيىم سالىنعان", - دەدى ۆيتسە-مينيستر.

ايتا كەتسەك، بيلەت ساتاتىن سايتتاردا الداعى ايلارى ەلوردا مەن الماتىدا سكريپتونيت، Emin, "نەرۆى" توبى جانە تاعى باسقا ارتىستەردىڭ كونتسەرتتەرى وتەتىنى كورسەتىلگەن.

پىكىرلەر