نۇر-سۇلتان قالاسى قازاقستان حالقى اسسامبلەياسىنىڭ ۇيىمداستىرۋىمەن ەلوردا دوستىق ۇيىندە ماسلەنيتسا مەرەكەسى اتاپ ءوتىلدى دەپ حابارلايدى «ادىرنا» ۇلتتىق پورتالى قازاقستان حالىق اسسامبلەياسىنا سىلتەمە جاساپ.
ءىس-شارانىڭ نەگىزگى ماقساتى – قازاقستاندا تۇرىپ جاتقان ەتنوستاردىڭ ادەت-عۇرىپتارى مەن سالت-داستۇرلەرىن قۇرمەتتەۋ، ولاردىڭ مادەنيەتارالىق ۇلگىسىن كورسەتۋ، قوعامداعى حالىقارالىق كەلىسىمدى جانە تۇراقتىلىقتى نىعايتۋ.
مەرەكەگە قازاقستان حالقى اسسامبلەياسى اتىنان سايلانعان 9 دەپۋتات، رەسەيدىڭ قازاقستانداعى ەلشىلىگىنىڭ وكىلى مەن نۇر-سۇلتان قالاسى ىشكى ساياساتى باسقارماسىنىڭ باسشىسى قاتىستى. شارا بارىسىندا مەرەكەگە وراي پىسىرىلگەن مىڭ قۇيماق تاراتىلىپ، ىستىق شاي بەرىلدى.
كونتسەرتتىك باعدارلاما كەزىندە «كۋكلا-ماسلەنيتسا»، «بوگاتىر» بەينەبايقاۋلارى مەن بالالار اراسىندا وتكەن شىعارماشىلىق كونكۋرستىڭ قورىتىندىسى شىعارىلىپ، جەڭىمپازدارعا باعالى سىيلىقتار مەن العىسحاتتار تابىس ەتىلدى. كونتسەرتتىك باعدارلاما اياقتالعاننان كەيىن دوستىق ءۇيىنىڭ الدىنا قويىلعان سابان قۋىرشاعىن ورتەۋ ءراسىمى بولدى.
سونىمەن قاتار تاراز قالاسىنىڭ دوستىق ۇيىندە ماسلەنيتسا مەرەكەسى اتالىپ ءوتتى.
ءىس-شارانى «رادونەج» ورىس قاۋىمداستىعى، جامبىل وبلىسى اكىمدىگىنىڭ ءىسب «قوعامدىق كەلىسىم» كمم ۇيىمداستىردى. مەرەكەلىك جيىنعا «رادونەج» ورىس قاۋىمداستىعىنىڭ ۇجىمدارى، №2 جالپى ورتا ءبىلىم بەرۋ مەكەمەسىنىڭ مۇعالىمدەر قۇرامى مەن وقۋشىلارى، ەتنومادەني بىرلەستىكتەردىڭ وكىلدەرى – «دنيپرو» ۋكراين ەتنومادەني ورتالىعى، «اينۋرى» تاتار-باشقۇرت ەتنومادەني ورتالىعى، جامبىل وبلىسىنىڭ نەمىستەر قوعامى، وبلىستىق ورىس دراما تەاترىنىڭ شىعارماشىلىق توپتارى، بالالار شىعارماشىلىعى ورتالىعىنىڭ بي ۇجىمدارى مەن انشىلەرى، سونداي-اق وبلىستىق جانە قالالىق باق وكىلدەرى قاتىستى. شارا بارىسىندا قوناقتار «شيروكايا ماسلەنيتسا» تەاترلاندىرىلعان قويىلىمىن تاماشالاپ، ءداستۇرلى ورىس قۇيماقتارىنان اۋىز ءتيدى. ءىس-شارا سوڭىندا دوستىق ءۇيى عيماراتى ماڭىندا سابان قۋىرشاعىن سالتاناتتى ورتەۋ ءراسىمى وتكىزىلدى.
سول سياقتى قىزىلوردا قالاسىنىڭ دوستىق ۇيىندە «سلاۆيانە» قوعامدىق مادەني-ورتالىعى» قوعامدىق بىرلەستىگى جانە «قوعامدىق كەلىسىم» كمم ۇيىمداستىرۋىمەن ماسلەنيتسا مەرەكەسى ءوتتى.
«سلاۆيانە» قوعامدىق مادەني-ورتالىعى» قوعامدىق بىرلەستىگىنىڭ جەتەكشىسى گالينا ششەرباكوۆا مەرەكەنىڭ ءمان-ماعىناسىن ءتۇسىندىرىپ، وعان اتسالىسقان بارشا جاندارعا العىس ايتتى. شارادا ەتنومادەني بىرلەستىك جەتەكشىلەرىنىڭ قاتىسۋىمەن ءتۇرلى ويىندار وتكىزىلدى. سونداي-اق، تاتتىلەر مەن قولونەر تۋىندىلارى كورمەگە قويىلدى.
ماسلەنيتسا مەرەكەسىنىڭ ءداستۇرلى تاعامى قۇيماق قاتىسۋشىلارعا تەگىن تاراتىلدى. شارا سوڭىندا قۋىرشاق جاعۋ ءراسىمى بولدى.
