«اق سەنىم» قايىرىمدىلىق قورى ناۋقاس بالامنىڭ اتىنان اقشانى جيناپ الىپ، مەنى دالادا قالدىردى»،- دەيدى بىزگە حابارلاسقان الماتىلىق بەيسەنباەۆا اعايشا.
بەس بالاسىن جالعىز اسىراپ-باعىپ وتىرعان اعايشانىڭ ەكى بالاسى ناۋقاس ەكەن. مىنە، سول ەكى مۇگەدەك بالالارىنىڭ ەمىنە قارجىدان قينالىپ وتىرعان اعايشانىڭ ۇيىنە ءوز ايتىسى بويىنشا الماتى قالاسى، مەدەۋ اۋداندىق اكىمدىگى ارقىلى «اق سەنىم» اتتى قايىرىمدىلىق قورىنىڭ وكىلدەرى كەلگەن. قوردىڭ ادامدارى اعايشانىڭ بالالارىنىڭ دەنساۋلىعىنا قاتىستى مالىمەتتەردى دە اكىمدىكتەن الىپتى. قايىرىمدىلىق قور وكىلدەرى ناۋقاس بالالارعا كومەكتەسەتىنىن ايتىپ ۋادە بەرەدى.
ءۇش اي بويى اعايشانىڭ ماتەريالدىق شىعىندارىن دا كوتەرۋگە ۋادە بەرگەن قوردىڭ ادامدارى ناۋقاس بالالاردى فوتو-ۆيدەوعا دا ءتۇسىرىپ الىپ كەتكەن. اۋرۋ بالالاردىڭ فوتو-ۆيدەولارىن الەۋمەتتىك جەلىلەرگە جاريالاعان «اق سەنىم» قايىرىمدىلىق قورى جينالعان اقشانىڭ ناقتى سوماسىن كورسەتپەي، ءبىراز قاشقاقتاعان. كەيىن اعايشا ءوز ادامدارى سالعان اقشانىڭ تۇبىرتەگىن كورسەتكەندە عانا قور وكىلدەرى «ءيا، 60 مىڭ تۇگەلدەي جينالدى. ول اقشانى پاتەراقىڭىزعا تولەيمىز» دەيدى. نە كەرەك، اعايشانىڭ ناۋقاس بالالارى ءۇشىن باس-اياعى 950 مىڭ تەڭگەدەي اقشا جينالادى.
الايدا «اق سەنىم» قورى «اقشانى قولعا بەرمەيمىز، تەك پاتەرىڭىزدىڭ اقىسىن تولەيمىز، بالالارعا كيىم الامىز، كەرەك دارىلەردى ساتىپ اپەرەمىز» دەپ، كيىلگەن، ەسكى كيىمدەردى ءبىر اكەپ بەرەدى. سودان كەيىن «ءوزىمىز جينادىق» دەپ 100 مىڭ تەڭگەدەي اقشانى قولىنا ۇستاتقان. ميلليونعا جۋىق جينالعان اقشادان باس-اياعى 180 مىڭ تەڭگە عانا بەرگەن «اق سەنىم» قايىرىمدىلىق قورىنىڭ وكىلدەرى كەيىن قوڭىراۋلارعا جاۋاپ بەرمەي، ءتۇرلى سىلتاۋلار ايتىپ قاشقاقتاي باستايدى. ەڭ سوڭىندا «ءبىز بۇل جۇمىسپەن اينالىسۋدى قويدىق» دەپ قىسقا قايىرىپ، جالت بۇرىلادى. «بۇل قالاي سوندا؟ «اق سەنىم» قايىرىمدىلىق قورى مەنىڭ ناۋقاس بالالارىم ءۇشىن اقشا جيناپ الدى. بۇل قور مەدەۋ اۋداندىق اكىمدىگى ارقىلى كەلدى بىزگە. سوندا مۇقتاج جانداردىڭ قاسىرەتى قايىرىمدىلىق قورلاردىڭ پايدا تابۋ كوزىنە اينالعانى ما؟ قۇقىق قورعاۋ ورگاندارى قايدا قاراپ وتىر؟» دەپ اشىنادى اعايشا.
اۋدان تۇرعىندارىنا قاتىستى مالىمەتتەر اۋداندىق اكىمدىكتە بولاتىنىن ەسكەرسەك، «اق سەنىم» قايىرىمدىلىق قورىنىڭ اعايشانىڭ وتباسىنا قاتىستى اقپاردى اكىمدىكتەن العانى راس تا بولۋى مۇمكىن. ەگەر راس بولسا، وندا مىناداي قورلارمەن بىرلەسە جۇمىس اتقارىپ وتىرعان اكىمدىك وكىلدەرىنىڭ ارەكەتتەرىن قالاي باعالاۋعا بولادى؟
مۇقاش مۇراتۇلى،
«ادىرنا» ۇلتتىق پورتالى.
