«ادىرنا» ۇلتتىق پورتالى كوتەرگەن ماڭىزدى ماسەلە بايقوڭىرلىق باسشى-قوسشىلاردى بەي-جاي قالدىرماپتى. بايقوڭىرداعى اۋرۋحانادا ارنايى جينالىس ءوتتى. پورتالىمىزدا تاياۋدا عانا قىزىلوردا وبلىسى، بايقوڭىر قالاسىنداعى دارىگەرلەردىڭ ءوز ىسىنە سالعىرت قاراۋ پروبلەماسى تۋرالى تۇرعىنداردىڭ شاعىمى جاريالانعان بولاتىن. مىنە، وسى ماسەلەگە بايلانىستى كەشە رەداكتسيامىزعا تاعى دا بايقوڭىرلىق ازاماتتار حابارلاسىپ، تومەندەگى جاعدايدى باياندادى.
گاليفا داربۋزوۆانىڭ ايتۋىنشا، دارىگەرلەر ەشكىمدى قاتىستىرماي، ءوز اراسىندا جينالىس وتكىزگەن. بايقوڭىرلىق تۇرعىنداردىڭ نەگىزگى شاعىمى جەرگىلىكتى اۋرۋحانا دارىگەرلەرى ناۋقاستارعا ءتيىستى دەڭگەيدە كومەك كورسەتپەيدى. سونىمەن قاتار پروبلەما بويىنشا شاعىمدانعاندارعا رەسەيلىك قۇقىق قورعاۋشىلار تاراپىنان «رەسەي فەدەراتسياسىنىڭ زاڭىنا سايكەس» دەپ باستالاتىن ەسكەرتۋ جاسالادى ەكەن. بۇل از دەسەڭىز، ناۋقاستارعا قويىلاتىن دياگنوزدا كوپ قاتەلىك بولۋ سەبەبىنەن، تۇرعىندار زارداپ شەگۋدە. بايقوڭىر قالالىق اۋرۋحانا باسشىسىنان باستاپ، باسقا دا دارىگەرلەرگە قاتىستى جەرگىلىكتى تۇرعىنداردىڭ جان ايعايى ءتيىستى ورگاندارعا جەتىپ، قاجەتتى قادامدار جاسالسا دەيدى تۇرعىندار. سونىمەن قاتار ەگەر بۇل ماسەلە شەشىمىن تاپپاسا، ق.توقاەۆقا ۇندەۋ جولداپ، ەگەر قۇقىقتارى قورعالماسا، باسقا دا ارەكەتتەرگە باراتىنىن مالىمدەگەن بايقوڭىرلىقتاردىڭ بار ءۇمىتى باسقارۋشى بيلىكتە.
«ادىرنا» ۇلتتىق پورتالى.
