Atyraý oblysynyń ákimi Mahambet Dosmuhambetov 8-naýryz áıelderdiń halyqaralyq kúnine oraı óńirdiń qyz-kelinshekterin quttyqtady.
«Ómir sizdermen shýaqty» atty is-sharaǵa qoǵam qaıratkerleri, ardager jáne kóp balaly analar men qala, aýdandardan kelgen ár salada qyzmet etip júrgen qyz-kelinshekteri qatysty.
Aımaq basshysy aldymen áıel zatynyń adamzat tarıhy men álem órkenıetindegi erekshe róline toqtaldy. Ulttyq tarıhta da halqymyzdyń anaǵa izet, áıelge qurmetti ár kúni jasaıtynyn, onyń ǵasyrlar boıy kele jatqan basty qundylyǵymyz ekenin atap ótti.
«Álemdegi jaqsylyq, izgilik pen qaıyrymdylyq — ananyń aq súti men asyl armanynyń jemisi ispetti. Al eshkimge bas ımegen batyr da, eshkimdi bet qaratpaǵan aqyn da ananyń aldynda bas ıedi. Bul tereń tarıhymyzdan kele jatqan aq jaýlyqtylarǵa degen aıryqsha qurmet, ulaǵatty izet! Óıtkeni, qyzyn qurmettep tórge ozdyrǵan, jaryn álpeshtep, anasyn aıalaǵan eldik sanamyz bar. Sondyqtan qyz-kelinshekterimizdiń arasynan batyr da, aqyn da, tutas elge tutqa bolǵan danalar da shyqqan»,- degen Mahambet Dosmuhambetov áıel qaýymynyń Táýelsizdikti nyǵaıtýda memleketimizdiń qoǵamdyq-saıası, ekonomıkalyq, áleýmettik-mádenı jalpy barlyq salanyń damýyna zor úles qosyp kele jatqanyn aıryqsha atady. Sonymen qatar, ult tarıhynda, dástúrli otbasy ınstıtýty men urpaq tárbıesindegi analardyń zor róline rızashylyǵyn bildirdi.
«Sizder, elimizdiń bolashaǵy úshin uly mıssııa atqaryp otyrsyzdar. Qazirgi qoǵamda tek shańyraqtyń shattyǵy ǵana emes, eldik isterdiń basy-qasynda da júrsizder. Atyraýlyq qyz-kelinshekter de kásipkerlik pen saıasat, bilim men densaýlyq, ǵylym men ónerde óreli isterimen kózge túsip, jetistikterimen qýantýda. Sondyqtan Sizder arqyly barsha analarymyzǵa, apa-qaryndastarymyzǵa erekshe alǵysymdy bildirem!»,-dedi quttyqtaý sózinde.
Aqyn, QR Eńbek sińirgen qaıratkeri Aqushtap Baqtygereeva bastap, eńbek ardageri, dáriger, polıııa, muǵalim, sondaı-aq ónerkásip pen óner salasy sondaı-aq qoǵamdyq uıym ókilderi kezekpen sóz alyp, barlyq analar men qyz-kelinshekterge ystyq lebizderin jetkizdi.
Memlekettik qyzmet isteri salasynyń ardageri, Atyraý oblysynyń Qurmetti azamaty Rashılıa Mursalıeva pandemııalyq qıyndyqtarǵa qaramastan eń bastysy óńirde aýqymdy jumystar jasalyp jatqanyna toqtaldy.
«Alymen eldegi qıyndyqtarǵa qaramastan elimiz de, óńirimiz de damý jolyn jalǵastyryp keledi. Kúrdeli kezeńde analarymyz ben qyz-kelinshekterimiz eren eńbek etti. Memleketimiz pandemııadan tolyq arylyp, aldaǵy ýaqytta óńirimizdiń órkendeýi jalǵassyn. Barlyq analarymyzdyń tilegi osy!»,- dedi ol.
Sondaı-aq, is-sharada áıel qaýymy ásem án shyrqap, qyz-kelinshekterge estelik syılyqtar men gúl shoqtary tabystaldy.
"Adyrna" ulttyq portaly
