NASA-نىڭ "Perseverance" اپپاراتى مارس پلانەتاسىندا تىرشىلىك بولعانىن انىقتاماق

2471
Adyrna.kz Telegram
بۇگىن 18 اقپان كۇنى NASA-نىڭ "Perseverance" اتتى اپپاراتى مارس پلانەتاسىنا قونادى. ەگەر ءبارى ءساتتى وتسە اپپارات الداعى ۋاقىتتا مارس پلانەتاسىندا عىلىمي-زەرتتەۋ جۇمىستارىن جۇرگىزۋدە ۇلكەن رول اتقارماق.
ەڭ قىزىعى عالىمدار اپپاراتقا مارستاعى كومىرقىشقىل گازدان ادام دەمالۋىنا قاجەتتى وتتەگى وندىرەتىن ارنايى قوندىرعى ورناتقان.
ەگەر تەست ءساتتى وتسە دەمەك مارس پلانەتاسىندا بار كومىرقىشقىل گازدى وتتەگىگە اينالدىرۋعا بولادى دەگەن ءسوز.
"Perseverance" اپپاراتى مارس پلانەتاسىن زەرتتەپ، قىزىل پلانەتادا بولعان نەمەسە بولۋى مۇمكىن ميكروبيولوگيالىق تىرشىلىك يەلەرىن ىزدەۋمەن اينالىسادى. ميللياردتاعان جىل بۇرىن بۇل پلانەتادا تىرشىلىك يەسى بولدى ما، قازىر بار ما دەگەن سۇراقتارعا جاۋاپ ىزدەيدى.
NASA 2025 جىلدان كەيىن اپپاراتتىڭ مارس قىرتىستارىنان جيناعان زەرتتەۋ وبەكتىلەرىن جەرگە اكەلىپ، ساراپتامادان وتكىزۋدى دە جوسپارلاپ وتىر. جەر گرۋنتتارىمەن مارستان كەلگەن دۇنيەلەردى سالىستىرىپ، عالامنىڭ جاراتىلىسى، فيزيكا، حيميا، بيولوگيا سالاسىندا بۇرىن ادامزات بالاسىنا بەلگىسىز بولىپ كەلگەن زاڭدىلىقتاردى اشۋ مەن قىزىل پلانەتاعا ادام جىبەرۋدىڭ جاڭا جولدارىن جەتىلدىرۋدى كوزدەۋدە.
اپپاراتقا "Perseverance" دەگەن اتتى بەرۋ پروتسەسى دە قىزىق. ول ءۇشىن اقش-تا مەكتەپ وقۋشىلارى اراسىندا كونكۋرس جاريالانعان. وقۋشىلار شىعارما جازىپ، اپپاراتتى قالاي اتاۋ كەرەكتىگى جايلى ءوز ويلارىمەن بولىسكەن. كوپ نۇسقانىڭ ىشىنەن "Perseverance" ياعني "تاباندىلىق" دەگەن اتاۋ تاڭداپ الىنعان.
باۋىرجان سەرىكباەۆ،
"ادىرنا" ۇلتتىق پورتالى 
پىكىرلەر