رەسەيدىڭ ۆولوگدا قالاسىندا ستالينگە ارنالعان داۋلى ەسكەرتكىشتى قالدىرۋ تۋرالى شەشىم قابىلداندى. بۇل تۋرالى «ينتەرفاكس» اگەنتتىگىنە ۆولوگدا مەملەكەتتىك مۋزەي-قورىعىنىڭ باس ديرەكتورى يۋليا ەۆسەەۆا مالىمدەدى، دەپ حابارلايدى "ادىرنا".
ونىڭ ايتۋىنشا، مەموريالدى ورناتۋ تۋرالى كەلىسىمشارتتى سولتۇستىك-باتىس وكرۋگىنىڭ اربيتراجدىق سوتى جارامسىز دەپ تانىعانىنا قاراماستان، ەسكەرتكىشتى الىپ تاستاۋ جونىندە شەشىم قابىلدانباعان. ەۆسەەۆا سوت شەشىمى تولىق ورىندالعانىن، ەسكەرتكىش تۇرعىزۋعا بولىنگەن قاراجاتتىڭ قايتارىلعانىن اتاپ ءوتتى.
باس ديرەكتوردىڭ سوزىنشە، ءمۇسىن باستاپقىدا كەرى قايتارىلعان، الايدا قازىرگى ۋاقىتتا ول مۋزەيدىڭ قوزعالمالى مۇلىككە قاتىستى كەلىسىمشارت نەگىزىندە وتەۋسىز پايدالانۋعا الىنعان.
وسىلايشا، گەنەراليسسيمۋسقا ارنالعان ەسكەرتكىش ءوز ورنىندا قالا بەرەدى، دەپ سەندىردى يۋليا ەۆسەەۆا.
