سوڭعى ۋاقىتتا ەلىمىزدە بالالاردىڭ تەرەزەدەن قۇلاۋ جاعدايى جيىلەپ كەتتى. بۇل جاعدايعا بايلانىستى تجم دابىل قاقتى، دەپ حابارلايدى «ادىرنا» ءتىلشىسى.
ماسەلەن، اقتوبە وبلىسىندا ءبىر تاۋلىكتە ەكى بالا كوپقاباتتى ءۇيدىڭ تەرەزەسىنەن قۇلاپ كەتكەن.
«اقتوبە قالاسىنداعى ەسەت باتىر شاعىناۋدانىندا 6 جاستاعى بالا ەكىنشى قاباتتىڭ تەرەزەسىنەن قۇلاپ كەتتى. ال قاندىاعاشتا 4 جاستاعى بالا ءۇشىنشى قاباتتان قۇلاعان. ەكى جاعدايدا دا بالالار نەبارى بىرنەشە مينۋت قاراۋسىز قالىپ، ماساعا قارسى تورعا سۇيەنىپ، تومەنگە قۇلاپ كەتكەن»، – دەدى وبلىستىق پد 6 ءساۋىر كۇنى.
ال 7 ساۋىردە توتەنشە جاعدايلار مينيسترلىگى قوستاناي وبلىسىندا بالالاردىڭ تەرەزەدەن قۇلاۋىنا بايلانىستى 3 قايعىلى جاعداي تىركەلگەنىن مالىمدەدى.
«قازىرگى ۋاقىتتا قۇتقارۋشىلار ۇشقىشسىز ۇشۋ اپپاراتى ارقىلى داۋىس زورايتقىشپەن تۇرعىندارعا ەسكەرتۋ جۇرگىزۋدە. ءبىر ساتتىك بەيقامدىق – ورنى تولماس قايعىعا اكەلۋى مۇمكىن. بالالاردىڭ قاۋىپسىزدىگى – ءبىزدىڭ ورتاق مىندەتىمىز»،-دەپ جازدى مينيسترلىك.
ايتا كەتەيىك، سوڭعى 3 جىلدا ەل كولەمىندە 104 بالا كوپقاباتتى ءۇيدىڭ تەرەزەسىنەن قۇلاپ كوز جۇمسا، 600-گە جۋىعى ءتۇرلى جاراقات العان.
