Túrkistan oblysy turǵynynyń ózine amanattalǵan qos baýyryna qoly jetpeı júr. Qytaıda qalǵan inisiniń 8 jáne 10 jastaǵy qos perzentin Saryaǵash aýdany bilim bólimindegiler tartyp áketken.
Endi olardy kórý úshin 130 shaqyrym jol júrip Shymkentke keledi, dep habarlady "Astana" arnasy.
Saryaǵash aýdanynyń turǵyny Qurmanǵazy Jamalbek 19 qarashadan beri úsh kún saıyn Shymkentke sabylyp júr. Aıtýynsha, Qytaıda turatyn inisi 2019 jyldyń jeltoqsanynda eki perzentin mektepke ornalastyrý úshin elge ákelgen. Aǵasyna senim hat rásimdep, ózi keri qaıtqan.
"Karantınge baılanysty óte almaı jatyr. Shekara ashylatyn bolsa qazir-aq keleıin dep tur. Balalardyń myna jerde jatqanyn olar da qalamaıdy. Baýyrlarym ashýlanyp jatyr. Biz atajurtymyzǵa kóshemiz dep otyrsaq, balalarymyzdy qamap qoıdy", - deıdi Saryaǵash aýdanynyń turǵyny Qurmanǵazy Jamalbek.
Aıta keterligi, beıimdeý ortalyǵynda balalar 90 kúndeı ǵana bola alady. Qazir kórsetilgen merzim aıaqtalýǵa taıaý. Qujat der kezinde rásimdelip bitpese, balalar Qytaıǵa keri deportaııalanýy ábden múmkin.
"Biz kóshi-qon organdaryna hat joldadyq. Odan keıin balalar quqyǵyn qorǵaý jónindegi komıtetke de, ózimizdiń basshylyqqa da, basqarmaǵa da hattar joldandy. Tıisinshe sheship beremiz degen jaýaptar alynyp jatyr", - deıdi Shymkent qalasy bilim basqarmasy kámeletke tolmaǵandardy beıimdeý ortalyǵy dırektorynyń orynbasary Nazgúl Qurmanalıeva.
Al Saryaǵash aýdandyq bilim bólimindegilerdiń óz ýáji bar. Olar bul jaǵdaı balalardy ortalyqqa ótkizgenge deıin ábden zertteldi dep otyr.
"Turmystyq jaǵdaıy saı kelmedi. Ol kisiniń tabys kózi joq edi. Turaqty turatyn jeri joq. Meshit janyndaǵy úıde turdy. Ul men qyzdyń jatatyn orny bólek bolý kerek", - dep túsindirdi Saryaǵash aýdandyq bilim bóliminiń ádiskeri Aıbek Qulqaraev.
Bilim bólimindegilerdiń bilýinshe, Qurmanǵazy Jamalovtyń óz baýyrlaryn qamqorlyǵyna alatyn bir ǵana múmkindigi bar kórinedi. Ol úshin jasóspirimder Qytaı azamaty bolǵandyqtan qamqorshylyqqa alýǵa ruqsatty sol jaqtan aldyrtý qajet. Munan soń aǵalary úsh aılyq kýrstan ótip, balalarǵa jaǵdaı jasalǵannan keıin ǵana qoly jetedi dedi.
