بىزدەگى ءبىلىم سالاسىندا مۇعالىمدەردىڭ بىلىكتىلىگى مەن ءبىلىمىن انىقتايتىن ءىس شارا تۇرلەرى جەتكىلىكتى. سونىڭ ءبىرى ۇستازداردى اتتەستاتسيادان وتكىزۋ. وسى اتتەستاتسيادان ءوتۋ ماسەلەسىنە بايلانىستى بىرقاتار مۇعالىم ونىڭ كەمشىن تۇستارىن ايتۋداي ايتىپ، جازۋداي جازۋدا. وكىنىشكە قاراي، كەمشىلىكتەر تۇزەتىلۋدىڭ ورنىنا، كەرىسىنشە ورەسكەل قاتەلىكتەرگە جول بەرىپ جاتقانداي.
مۇعالىمدەردى اتەستاتسيادان وتكىزۋگە بايلانىستى جازباسىندا ايمان ساعيدۋللا: «جالپى مۇعالىمدەر تەست تاپسىرىپ، پورتفوليو جيناپ ، اۆتورلىق باعدارلاما جازىپ بولىپ اتتەستاتسيادان ارەڭ وتەدى. دۇرىس دەيىك.
ال، شەت ءتىلىن جەتىك مەڭگەرگەن مۇعالىم، شەت ءتىلىن مەڭگەرگەنى تۋرالى سەرتيفيكاتى بولسا، اۆتوماتتى تۇردە اتتەستاتسيادان وتەدى» دەيدى. وسى ماسەلەگە بايلانىستى ايمان ۇستازدىڭ وزىنە حابارلاسقانىمىزدا، "پەداگوگ مارتەبەسى تۋرالى" زاڭدى ىسكە اسىرۋ اياسىندا قابىلدانعان قۇجاتتى العا تارتتى.
«باقساق، باقا ەكەن» دەمەكشى، قۇجاتتىڭ (سۋرەتتە) 50-ءشى پۋنكتىندە اعىلشىن، فرانتسۋز جانە نەمىس ءتىلىنىڭ قاجەتتى دەڭگەيىن مەڭگەرگەنىن راستايتىن سەرتيفيكاتى بار شەت ءتىلىن وقىتۋشى ۇستازدارعا بىلىكتىلىك ساناتى اتتەستاتسيادان وتكىزىلمەي-اق بەرىلەتىنى تايعا تاڭبا باسقانداي كورسەتىلىپتى. وسى 50-ءشى پۋنكتكە ءۇڭىلىپ قاراپ، وقىپ شىققانشا، مىنا قۇجات قازاقستان مۇعالىمدەرى ءۇشىن ەمەس، شەتەل مۇعالىمىنە ارنالعانداي كورىندى.
ءبىلىم مينيسترلىگىنىڭ بۇل قۇجاتتى دايىنداۋدا شەت ءتىلىن مەڭگەرگەن، «بولاشاق» سياقتى ءتۇرلى باعدارلامامەن شەتەلدە ءبىلىم العان مىقتى جاستاردى جۇمىسقا تارتۋدى ماقسات ەتكەنى انىق. الايدا شەتەل كورگەن ادامنىڭ ءبىزدىڭ مەكتەپتەرگە جۇمىس ىستەۋگە ىقىلاس تانىتا قويۋى ەكىتالاي ەمەس پە؟ مەكتەپ بىلاي تۇرسىن، شەتەل اسقان جاستاردىڭ جارتىسىنان كوبى ەلگە كەرى قايتپاۋعا بارىن سالۋدا. ولاي بولسا، ءبىلىم سالاسىنا قاتىستى سالماقتى قۇجاتتا مەملەكەتتىك تىلگە ەمەس، شەتەل تىلىنە سونشاما باسىمدىق بەرۋدىڭ قانشالىقتى قاجەتى بار؟ شەت ءتىلىن بىلگەنى ءۇشىن جوعارى دارەجەدەگى ساناتقا وپ-وعاي سىرعىپ وتۋگە بولاتىن بولسا، ونداي «بىلىكتى مۇعالىمنىڭ» ءبىلىم سالاسىنداعى تاجىريبەسى قالاي ولشەنبەك؟ تۇسىنىكسىز.
وسىعان دەيىن ەڭبەك وتىلىنە، تاجىريبەسىنە قاراي وتەتىن اتتەستاتسيادان قازىر ءبىر پاراق سەرتيفيكاتپەن الاڭسىز وتۋگە بولادى ەكەن وندا. كەز كەلگەن ماماندىق يەسىنىڭ بىلىكتىلىگىن تاجىريبەسى انىقتايتىنىن ەسكەرسەك، مىناداي قۇجاتپەن اعىلشىنشا سايراپ تۇرعان، بىراق وقىتۋ دەگەننىڭ نە ەكەنىن بىلمەيتىن ءدۇبارالار مەكتەپتەردى جاۋلاماسىن دەپ تىلەيىك.
ەندىگى ءبىر ماسەلە، وسى قۇجاتتاعى شەت ءتىلىن وقىتۋشى ماماندارعا بەرىلەتىن مىناداي مۇمكىندىك مەملەكەتتىك ءتىلدى جەتىك بىلەتىن ماماندارعا نەگە بەرىلمەيتىنىندە. قازاقستاندا اعىلشىن ءتىلىن بىلسەڭ، جولىڭ ايقارا اشىق، ال مەملەكەتتىك ءتىلدى بىلەتىندەر شە...؟ مەملەكەتتىك ءتىلدى بىلەتىندەر جانتالاسىپ پورتفوليو تولتىرىپ، كەرەكتى-كەرەكسىز قاعازداردى جيناپ، جانتالاسىپ اتتەستاتسيا تاپسىرۋى كەرەك. بۇل الالاۋ ەمەس پە؟ بۇل ادىلەتسىزدىك ەمەس پە؟ ءسىز ۇالاي ويلايسىز؟
مەرۋەرت حۋساينوۆا،
«ادىرنا» ۇلتتىق پورتالى.
فوتو اشىق دەرەككوزدەن الىندى.
