جۋرناليست سالتان سايرانۇلى جەلىگە تاراعان وقۋشىنىڭ ءدىن تۋرالى ايتقان ۆيدەوسىنا پىكىر ءبىلدىردى، دەپ حابارلايدى “ادىرنا” ۇلتتىق پورتالى.
ايتۋىنشا، مەكتەپ وقۋشىسىنىڭ نەگىزسىز، دالەل-دايەكسىز، جالعان فاكتىلەرمەن باتىل سايراپ تۇرعانى – «مۇعالىمىنىڭ» تەرىس اقپاراتتارمەن وقۋشىلارىنىڭ ميلارىن شايىپ، بۇرمالانعان مالىمەتتەرمەن پروگراممالاپ، جالعان دايەكتەردى ساناسىنا ءسىڭىرىپ تاستاعاندىعىنىڭ كورىنىسى.
“ۋاتسابىما مىنانداي ءبىر ۆيدەو كەلدى. تىڭداپ شىقتىم. مەكتەپ وقۋشىسىنىڭ بۇلاي نەگىزسىز، قيسىنسىز، دالەل-دايەكسىز، جالعان فاكتىلەرمەن باتىل سايراپ تۇرعانى – «مۇعالىمىنىڭ» تەرىس اقپاراتتارمەن وقۋشىلارىنىڭ ميلارىن شايىپ، بۇرمالانعان مالىمەتتەرمەن پروگراممالاپ، جالعان دايەكتەردى ساناسىنا ءسىڭىرىپ تاستاعاندىعىنىڭ كورىنىسى. بۇل ۆيدەونى ءتۇسىرىپ، تاراتۋى دا مۇعالىمىنىڭ ءوزىنىڭ بۇل «جەمىسى مەن جەتىستىگىنە» ماساتتانۋى، ماقتانىش كورۋى دەگەن ءسوز.
ءبىز دە بۇل ۆيدەوعا ءوزىمىزدىڭ پىكىرىمىزدى بىلدىرە كەتەيىك. سەبەبى، مۇنداي «پەداگوگتاردىڭ» بالالارىمىزعا ساباق بەرۋى – وتە قاۋىپتى. تەز ارادا شارا قولدانىلىپ، مەكتەپتەن الاستاتىلۋى ءتيىس دەپ ەسەپتەيمىز.
وقۋشى ءوزىنىڭ سوزىندە: «ەۆرەيلەر يسلام ءدىنىن ويلاپ تاپتى دا، ونى دامۋشى مەملەكەتتەرگە، ياعني ازيا، ساۋد ارابيا ەلدەرىنە وتكىزدى دە، ولار وزدەرىنەن ول ءدىندى الىپ تاستادى. ولاردىڭ وزدەرىنىڭ كونستيتۋتسيالىق زاڭدارى بويىنشا ولارعا ەشقانداي دا يسلام ءدىنى بولمايدى، ونى شەكتەپ تاستاعان. سەبەبى، يسلام ءدىنى ادامداردى بەلگىلى ءبىر نارسەلەردەن شەكتەيدى»، – دەيدى.
نە دەگەن سۇمدىق ءسوز بۇل؟ مۇنداي مالىمەتتى وقۋشى نە نارسەگە سۇيەنىپ ايتىپ وتىر، دۇرىسىن ايتساق، مۇعالىمى بۇنى قانداي مالىمەتكە سۇيەنىپ ۇيرەتىپ وتىر؟ وقۋشىنىڭ بۇل تەرىس پىكىرىن تۇزەتپەگەنىنە قاراعاندا، بۇل ويمەن مۇعالىمى دە كەلىسىپ وتىر دەگەن ءسوز. مۇنى مۇعالىمىنىڭ ۆيدەودا جانى كىرىپ، وقۋشىسىن قولپاشتاپ قولداپ وتىرعانىنان-اق تۇسىنۋگە بولادى. دەمەك، بۇل مۇعالىم سان عاسىردان بەرى اللادان كەلگەن يسلام ءدىنىن سالتىنا اينالدىرعان، بارلىق قۇندىلىعىن وسى يسلامعا نەگىزدەگەن اتا-بابامىزدى، تاريحىمىزدى، ۇلتتىعىمىزدى مانسۇقتاپ جاتقان قانشاما وقۋشى تاربيەلەپ جاتىر دەگەن ءسوز. سوسىن دەرەكسىز، نەگىزسىز، جالعان دايەكتەرمەن سويلەۋ – عىلىمعا، بىلىمگە ۇلكەن قيانات. وسىعان سۇيەنسەك، بۇل مۇعالىم ەرتەڭگى كۇنى ەلدىڭ بولاشاعىنا بالتا شاباتىن، عىلىمعا قيانات قىلاتىن، مەملەكەتكە ىرىتكى سالاتىن ۇرپاق تاربيەلەپ شىعۋدا”،- دەدى جۋرناليست، ءدىنتانۋ عىلىمىنىڭ ماگيسترى سالتان سايرانۇلى.
