عالامتور بەتتەرىندە «شىعىس قازاقستان وبلىسىندا التى جاسار بالا ناركوديسپانسەردە ەسەپتە تۇر» دەگەن اقپارات تاراپ كەتكەن.
ماسەلەنىڭ انىق-قانىعىن ءبىلۋ ءۇشىن «ديدار» گازەتىنىڭ ءتىلشىسى اتالعان ورتالىققا بارىپ، ءمان-جايعا قانىققان ەكەن. جازۋىنشا، ونداعى جاعداي مۇلدەم باسقاشا.
«بىرىنشىدەن، «اتى شۋلى» التى جاسار بالا ناركولوگيالىق ديسپانسەردە وسىدان ءۇش جىل بۇرىن ەمدەلىپ شىعىپتى. اۋەلى جەدەل جاردەم اۋرۋحاناسىنا جەتكىزىلگەن بالانىڭ جاعدايى تۋرالى ورتالىققا پوليتسيا قىزمەتكەرلەرى حابار بەرگەن كورىنەدى.
تەكسەرۋ بارىسىندا ونىڭ ىشىمدىك ىشكەنى ناقتىلانعان. بۇل جاعدايدىڭ بۇرىن دا الدەنەشە رەت قايتالانعانىن اڭگىمە بارىسىندا كەيىپكەردىڭ ءوزى دە راستاعان ەكەن.
ەكىنشىدەن، بالاقايدىڭ ماسكۇنەمدىككە سالىنعان دانەمەسى جوق. بالالار دارىگەرى ماناپ قاليەۆتىڭ ايتۋىنشا، الكوگوليزم دياگنوزى قويىلعانمەن، بالا اششى سۋعا تاۋەلدىلىككە ۇرىنباعان. بۇل بار بولعانى اتا-انانىڭ سالعىرتتىعىنان تۋىنداعان كەلەڭسىزدىك كورىنەدى»
بالانى ماماندار اي سايىن باقىلاۋدا ۇستاعان. كەيىن جاعدايى جاقسارعاندىقتان «تاۋەكەل توبىنان» بوساتىلعان. ايتسە دە، وسىعان ۇقساس وقيعا وبلىستا ەكىنشى رەت قايتالانىپتى.
بۇعان دەيىن ريددەر قالاسىندا اششى سۋعا ماسايعان جەتى جاسار ءبۇلدىرشىن اۋرۋحاناعا جەتكىزىلگەن. دارىگەرلەر وسىعان ۇقساس جاعدايدا ورتالىققا كەلىپ تۇسەتىن جەتكىنشەكتەر سانى ازايماي تۇرعانىن ايتىپتى، ءتىپتى سوڭعى بەس-التى جىلدا بۇل كورسەتكىش جوعارىلاماسا، تومەندەمەگەن.
«باستاپقىدا ورتالىققا تەك ىشىمدىك پەن شىلىمعا اۋەس جاسوسپىرىمدەر قارالۋعا كەلەتىن. بەرتىن كەلە مەكتەپ وقۋشىلارىنىڭ اراسىندا ناسىبايعا اۋەستىك پەن توكسيكومانيا بەلەڭ الا باستادى. ونىمەن دە كۇرەسىپ جاتىرمىز. ەسىرتكىلىك زاتتارعا ۇرىنعاندار دا بولدى. قازىرگى ۋاقىتتا پاراگەنەراتور دەگەن شىقتى. ونى كوبىسى «ەلەكتروندى شىلىم» دەيدى. بىراق ول - كوزالداۋ. شىندىعىندا، ول قالتاداعى كاليان. قۇرامىندا ناشا قوسپالارى بار. وسىلاردىڭ ءبارى جاسوسپىرىمدەردىڭ دەنساۋلىعىنا زيانىن تيگىزىپ جاتقانىن قايتەرسىز»-دەيدى دارىگەرلەر.
___________________________________________________________________________________________________________
inform.kz
