سلاۆيان قىزىنىڭ قازاق تىلىندە ءمىنسىز سويلەۋى كوپشىلىكتى تاڭقالدىردى. ۋكراين وتباسىندا دۇنيەگە كەلگەن ۆيكتوريا دوروشكو قازاق ءتىلىن جەتىك مەڭگەرگەن، دەپ حابارلايدى «ادىرنا» ءتىلشىسى Almaty.tv-عا سىلتەمە جاساپ.
ۆيكتوريا دوروشكو قوستاناي وبلىسى ناۋرىزىم اۋدانى قارامەڭدى اۋىلىندا دۇنيەگە كەلگەن. ول قازاق ءتىلىن ۇيرەنۋ بالا شاقتان باستاۋ العانىن ايتادى.
«ءبىزدىڭ كورشىلەرىمىزدىڭ ءبارى قازاق بولعان، بالالارمەن ويناپ ءجۇرىپ-اق قازاق ءتىلىن ۇيرەنە باستادىم. ونىڭ ۇستىنە اتا-انام مەنى قازاق تىلىندە وقىتاتىن بالاباقشاعا بەردى، وندا تاربيەشىلەر تەك سول تىلدە سويلەسەتىن. 5 جاسىمنان باستاپ قازاق تىلىندە انىق سويلەي باستادىم. الايدا مەنى ورىس مەكتەبىنە بەردى، بىراق قازاق ءتىلىن ۇمىتقانىم جوق. قازاق ءتىلى ءپانىنىڭ مۇعالىمى مەنىڭ ءتىلدى جەتىك بىلەتىنىمدى بايقاپ، ءتۇرلى بايقاۋعا، وليمپياداعا جانە عىلىمي جۇمىسقا قاتىستىرا باستادى. مەكتەپتەگى جەڭىستەر ماماندىق تاڭداۋعا دا كومەكتەستى. بالالاردى جاقسى كورگەندىكتەن مۇعالىم ماماندىعىن تاڭدادىم»، – دەيدى ارۋ.
ۆيكتوريا 9-سىنىپتان كەيىن رۋدنىي الەۋمەتتىك-گۋمانيتارلىق كوللەدجىنە تۇسكەن. الايدا جاقىندا «تۇران استانا» ۋنيۆەرسيتەتىنىڭ وقۋ گرانتىن جەڭىپ الدى.
«مەن گرانت تۋرالى جاڭا جىل قارساڭىندا ءبىلدىم. ەندى قازاق ءتىلى مەن ادەبيەتى ءپانىنىڭ مۇعالىمى ماماندىعىن وقۋ ءۇشىن ەلورداعا كوشپەكپىن. جاڭا ءبىلىم الۋ ءۇشىن ۇزدىكسىز دامۋ كەرەك جانە كەدەرگىلەردى جەڭگىم كەلەدى»، – دەيدى دوروشكو.
ۆيكتوريا گرانت يەگەرى اتانعانى تۋرالى جاعىمدى جاڭالىقتى بىلگەن ساتكە دەيىن قوستاناي №15 ورتا مەكتەبىندە اعىلشىن ءتىلى مۇعالىمى بولىپ جۇمىس ىستەگەن.
ۆيكتوريا جالپى ءبىلىم بەرەتىن پاندەر بويىنشا وقۋشىلار اراسىنداعى رەسپۋبليكالىق وليمپيادالاردىڭ جۇلدەگەرى بولىپ تابىلادى. اتاپ ايتقاندا، ورىس جاستارى اراسىنداعى «ءتىل پاراسات» بايقاۋىنىڭ جەڭىمپازى، عىلىمي جۇمىستارى دا باس جۇلدەگە يە بولعان. سونىمەن قاتار ۆيكتوريا قازاقستاندىق جاس پاتريوتتار اكادەمياسىنىڭ مۇشەسى، جوو ومىرىندەگى عىلىمي-قوعامدىق جانە شىعارماشىلىق قىزمەتكە بەلسەندى قاتىسقانى ءۇشىن «ۇزدىك ستۋدەنت – 2017» اتاعىنىڭ يەگەرى.
ۆ. دوروشكو قازاق ءتىلىن ءبىلۋ ومىردە ءوز ورنىن تابۋعا كومەكتەسەتىنىنە سەنىمدى.
«قازىر قازاقستاندا مەملەكەتتىك ءتىلسىز دامۋ مۇمكىن ەمەس. جالپى قازاق ءتىلى وتە كوركەم، ادەمى ءتىل. ونداعى كەيبىر سوزدەردى ورىس تىلىنە اۋدارساڭ، ءمان-ماعىناسىن جوعالادى. وزگە ءتىلدى مەڭگەرۋ ارقىلى سول ەلدىڭ مادەنيەتىمەن جاقىنىراق تانىساسىڭ، باسقا الەمگە ەنەسىڭ. «قانشا ءتىل بىلسەڭ، سونشا ءومىرىڭ بار» دەيدى، مەن سول پىكىرمەن تولىق كەلىسەمىن»، – دەيدى ول.
«ادىرنا» ۇلتتىق پورتالى
