Slavıan qyzynyń qazaq tilinde minsiz sóıleýi kópshilikti tańqaldyrdy. Ýkraın otbasynda dúnıege kelgen Vıktorııa Doroshko qazaq tilin jetik meńgergen, dep habarlaıdy «Adyrna» tilshisi Almaty.tv-ǵa silteme jasap.
Vıktorııa Doroshko Qostanaı oblysy Naýryzym aýdany Qarameńdi aýylynda dúnıege kelgen. Ol qazaq tilin úırený bala shaqtan bastaý alǵanyn aıtady.
«Bizdiń kórshilerimizdiń bári qazaq bolǵan, balalarmen oınap júrip-aq qazaq tilin úırene bastadym. Onyń ústine ata-anam meni qazaq tilinde oqytatyn balabaqshaǵa berdi, onda tárbıeshiler tek sol tilde sóılesetin. 5 jasymnan bastap qazaq tilinde anyq sóıleı bastadym. Alaıda meni orys mektebine berdi, biraq qazaq tilin umytqanym joq. Qazaq tili pániniń muǵalimi meniń tildi jetik biletinimdi baıqap, túrli baıqaýǵa, olımpıadaǵa jáne ǵylymı jumysqa qatystyra bastady. Mekteptegi jeńister mamandyq tańdaýǵa da kómektesti. Balalardy jaqsy kórgendikten muǵalim mamandyǵyn tańdadym», – deıdi arý.
Vıktorııa 9-synyptan keıin Rýdnyı áleýmettik-gýmanıtarlyq kolledjine túsken. Alaıda jaqynda «Turan Astana» ýnıversıtetiniń oqý grantyn jeńip aldy.
«Men grant týraly jańa jyl qarsańynda bildim. Endi qazaq tili men ádebıeti pániniń muǵalimi mamandyǵyn oqý úshin elordaǵa kóshpekpin. Jańa bilim alý úshin úzdiksiz damý kerek jáne kedergilerdi jeńgim keledi», – deıdi Doroshko.
Vıktorııa grant ıegeri atanǵany týraly jaǵymdy jańalyqty bilgen sátke deıin Qostanaı №15 orta mektebinde aǵylshyn tili muǵalimi bolyp jumys istegen.
Vıktorııa jalpy bilim beretin pánder boıynsha oqýshylar arasyndaǵy respýblıkalyq olımpıadalardyń júldegeri bolyp tabylady. Atap aıtqanda, orys jastary arasyndaǵy «Til parasat» baıqaýynyń jeńimpazy, ǵylymı jumystary da bas júldege ıe bolǵan. Sonymen qatar Vıktorııa qazaqstandyq jas patrıottar akademııasynyń múshesi, JOO ómirindegi ǵylymı-qoǵamdyq jáne shyǵarmashylyq qyzmetke belsendi qatysqany úshin «Úzdik stýdent – 2017» ataǵynyń ıegeri.
V. Doroshko qazaq tilin bilý ómirde óz ornyn tabýǵa kómektesetinine senimdi.
«Qazir Qazaqstanda memlekettik tilsiz damý múmkin emes. Jalpy qazaq tili óte kórkem, ádemi til. Ondaǵy keıbir sózderdi orys tiline aýdarsań, mán-maǵynasyn joǵalady. Ózge tildi meńgerý arqyly sol eldiń mádenıetimen jaqynyraq tanysasyń, basqa álemge enesiń. «Qansha til bilseń, sonsha ómiriń bar» deıdi, men sol pikirmen tolyq kelisemin», – deıdi ol.
«Adyrna» ulttyq portaly
